Ka rai jong ka Dorbar Shnong Erpakon ha Ri-Bhoi ban phah mih noh ïa ki bar jylla kiba don hapoh ka shnong, la ki dei kiba wan ban trei bylla, kiba sengkam sengjam ne kiba sah wai, ka long kum ka jingsneng ïa kiwei pat ki bar jylla kiba don ha Rilum Khasi Jaiñtia ba ki dei ban long kiba adkar. Lah ban kdew ba kane ka rai ka dei ba la shim da baroh ki paidbah nongshong shnong hadien ka jingshah pynïap dusmon jong u (L) Bah Kyrmen Lyngdoh Nonglait ha u bar jylla, ïa uba la tip kyrteng kum u Raju Rajbhar (42), uba trei bylla ha ka dukan bam RN Sharma Hotel. Hynrei wat lada ki bor shnong ki la ai por kumba shi bnai ïa ki bar jylla ba kin mih noh na katei ka shnong, hynrei la ïohi ba ki bar jylla, khamtam kito kiba trei bylla ha ka dukan RN Sharma Hotel, ki la dep ban phet krad noh tang khyndiat sngi hadien katei ka jingshah pynïap jong u (L) Bah Kyrmen.
Nalorkata, baroh ki Dorbar Shnong ki dei ban da peitngor bad husiar nangne shakhmat hashwa ban shah ïa kino-kino ki bar jylla ba kin wan shong wan sah ne sengkam sengjam ne wan bylla ha ki shnong ki thaw. Ka bakongsan ka long ban phah ïa ki kyrteng jong kito ki bar jylla sha ki pulit ba kin pynlong ïa ka jingwad bniah bad ban lap thikna la ki dei shisha ne em ba ki wan na ki shnong ki thaw bad ki jylla kumba ki kam lane ïoh ba ki la don dak sniew ha kiwei pat ki jylla bad ki wan sha kane ka Ri Khasi Jaiñtia ban rieh tngen. Na ka liang ki pulit ruh ki dei ban trei hok ïa la ka kam ban wad ïa ki jingtip kiba bniah khnang ba ki trai shnong kin lait na ka saw ka sian hadien habud. Namarkata, kumba ka tnat pulit ka ju kren na ka por sha ka por, ka dei ban don ka jingïatreilang kaba jan hapdeng ki shnong ki thaw bad kane ka tnat khnang ban lah ban ïada lypa ïa ki kam sniew kam smeh bad na ki runar kiba lah ban wan rieh tngen ha ki shnong bad ki jaka jong ngi. Lada kam don ka jingïatreilang, kan wanrah shibun bah ki jingeh ha ki sngi bad ki por ban wan.
Ki shnong ki thaw kim dei ban kmen tang ha ka jingïoh khajna ne jingsiew na ki nongwan buh ïa ki dukan ne kiwei pat. Ki dei ban da bishar bad ban peit na baroh ki liang hashwa ba kin ai jingbit. Ngim dei ban kheiñ shngaiñ ha kane ka pyrthei kaba la bun palat ki jingsniew kiba laiphew jait laiphew skit. Ngim tip la kito kiba wan shong wan sah ki dei kiba la don dak sniew sha kiwei pat ki shnong ki thaw bad ki wan pynlong jaka phet bad rieh tngen ha ki shnong ki thaw jong ngi. Sa shisien pat, ngi dei ban shim ïa ka jingjia ha Erpakon kum ka jingsneng bad jinghikai. Kam myntoi ba ngin babe hadien habud lada ngi khlem long kiba husiar bad peitngor naduh kaba sdang. Ngim donkam ïa kita ki dukan bam ne kiwei pat lada ka buh jingma kylla ïa ki nongshong shnong jong ngi. Kita ki bar jylla ki lah ban phet sha kiwei pat ki jaka kiba bun bah ha kane ka Ri ynda ki la dep leh ïa ki kam sniew kam smeh ha ki shnong ki thaw jong ngi. Shaei ngin ïa wad ïa kita?
Ki paidbah ki dei ban peitngor ïa ka rukom treikam ki Dorbar Shnong khnang ba kin ym leh katba ki mon. Lada ki paidbah ki sngap bad kim ong eiei, ki Dorbar Shnong ki lah ban treikam katkum ka jingsngewbit bad jingbiang ïalade khlem da pyrkhat shuh ïa ka jingmyntoi ne jingduh jingmyntoi jong kiba bun ba lang. Ngim dei ban sngewthuh bakla ba kaei kaba la jia ha ka shnong Erpakon kan ym jia ha kiwei pat ki shnong ki thaw. Ha kane ka pyrthei sniew, kano-kano ka jingsniew ka lah ban wan jia ha kano-kano ka jaka bad ha kano-kano ka por lada ngi pynduna ne pynhiar ïa ka jinghusiar bad jingpeitngor. Ki paidbah ki dei ban shlan ban kren pyrshah ïa ki Dorbar Shnong lada ki shem ba kim treikam katkum ki kyndon lane ki ïaid lait na ka mon jong uba bun ba lang lane ki leh bym suidñiew ïa ka bha ka miat jong ki nongshong shnong. Ngi dei ban buh shwa hakhmat ïa ka jinglong shngaiñ jong ka shnong ka thaw bad ki paidbah ban ïa kiei-kiei. Lada ngi duh ïa ka jingshngaiñ, kam don jingmyntoi ban ïa pyrkhat ïa kiwei pat ki kam ki jam.
Na ka liang ka sorkar bad ki bor distrik ki dei ban pynlong ïa ki jingkhynra bad jingleit peit bniah ïa baroh ki jaka/dukan ba don ki bar jylla khnang ban pynthikna ba kiba trei ba ktah kim dei satia ki ‘riewsniew lane kiba la don dak ha kiwei pat ki jylla. Ka ju jia ba kito kiba don dak sniew ha kiwei pat ki jylla, ki ju phet sha kiwei ki jylla khnang ban lait na ka jingshah kem ha ki pulit. Ki bor jong ka District Council ruh ki dei ban smat ban sting ha ka jingleit khynra ïa ki laisen khaïi (Trading Licence) na ka por sha ka por bad ym tang shisien ha ka shi snem. Lada ka sorkar, pulit bad District Council ki shimkhia da ka jingïatreilang bad ki Dorbar Shnong, ki nongleh ïa ki kam sniew kin ym don jaka ha kane ka jylla jong ngi. Ngi dei ban ïa pyrkhat sani bha na ka bynta ka lawei jong ki khun ki kti khnang ba kin ïoh ïa ka jylla kaba kham bha bad kham shngaiñ na kaei kaba ka long mynta.
