Nongstoiñ, Jymmang 22
Uwei u samla ba la tip kyrteng kum u Wadlad Nongphud, 23 snem, u la duh noh ïa la ka jingim hadien ka jingshah ïuh ha ka trok kaba la jia ha ka shnong Mawbyrshem ha New Nongstoiñ.
Katkum ka khubor na ki heh pulit ka West Khasi Hills District la ong ba katei ka jingjia ka la jia ha ka janmiet jong ka 21 tarik u Jymmang, 2024 bad ki pulit ki la ïoh ïa ka jingtip halor kane ha ka por kumba 6:30 eiei.
La ong ba katei ka jingshah ïuh trok jong utei u samla ka la jia ha ka por katba u dang ïaid lynti hapoh Mawbyrshem bad ïa katei ka trok kaba don ïa u nombor AS01-EC-2139 la ñiah da u Banjoplang Kharbani, 27 snem ka rta na ka shnong Nongbah ha South West Khasi Hills District.
Shuh shuh ka khubor na ki heh pulit, la ïathuh ruh ba ïa utei u samla la pynkit noh mar-mar sha Civil Hospital Nongstoiñ bad na ka liang jong ka Civil Hospital Nongstoiñ ruh ki la phah kit noh sha Shillong hynrei kaba sngewsih ba utei u samla u la khlad noh na ka jingjur palat ka jingmynsaw hapoh Nazareth Hospital Shillong.
Kumta ha kaba ïadei bad katei ka jingjia, na ka liang ki pulit ki la dep ban pynrung mukotduma ha thanat Nongstoiñ.
