Nongpoh, Jymmang 22
Ki nongïalam jong ka shnong Erpakon ba kynthup ïa u Bah M Thongni, Rangbah Shnong bad u Bah Lambor Kharshilot ki la ïathuh ba ki bar jylla kiba don hapoh ka shnong kim shym la noh synñiang satia sha ka shnong ka thaw la ka dei ha ka kam ïap kam im ne ka kmen ka sngewbha.
Ïa kane, kitei ki nongïalam shnong ki la pynpaw haba kren sha ki lad pathai khubor ha ka Sngi Balang ha Nongpoh, kata shisngi hadien ba ka Dorbar Pyllun jong ka shnong ka la shim ïa ka rai ban beh noh ïa baroh ki bar jylla kiba don hapoh ka shnong, la ki dei kiba wan ban trei bylla, kiba seng kam seng jam ne kiba sahwai ruh kumjuh.
Kitei ki nongïalam shnong, ki la pyntip ruh ba kane ka sienjam kaba la shim da ka shnong ka dei lyngba ka jingrai jong baroh ki paidbah nongshong shnong ba kynthup naduh ki samla kynthei, shynrang, ki longkmie longkpa bad ki tymmen ki san hadien ka jingshah pynïap dusmon jong u (L) Bah Kyrmen Lyngdoh Nonglait ha u bar jylla ba la tip kyrteng kum u Raju Rajbhar (42 snem) uba trei bylla ha ka dukan bam RN Sharma Hotel. Wat lada ki bor shnong ki la ai por kumba shibnai ïa ki bar jylla ba kin mih noh na katei ka shnong, hynrei la ïohi ba ki bar jylla khamtam kito kiba trei bylla ha katei ka dukan bam (RN Sharma Hotel) ba ki la dep ban phet krad noh tang khyndiat sngi hadien katei ka jingshah pynïap jong u (L) Bah Kyrmen Lyngdoh Nonglait.
