Shillong, Jymmang 22
Ki shipai Border Security Force (BSF) ha ka jingïatreilang bad ki pulit ka Meghalaya ki la ïoh ban kurup ïa ka shini bad u kwai tyrkhong na ki thaiñ khappud bad ka Bangladesh ha Rongra kaba dang hap ha South Garo Hills District.
Ka jingïoh kurup ïa ka shini bad u kwai tyrkhong ka la long hadien ba ki la ïoh jingtip ha kaba ki shipai BSF kiba peitngor ha ki thaiñ khappud bad ka Bangladesh, ha ryngkat ka jingïatreilang bad ki pulit ka Meghalaya, ki la hiar ban khynra ïa kawei ka ïing jah kaba la buhrieh ïa kine ki mar kiba la thmu ban khaïi tuh sha Bangladesh.
Ha kane ka jingleit khynra ki la ïoh ban kurup ka shini haduh 7000 kilo tam bad 6000 kilo tam u kwai tyrkhong. Ïa kane ka shini bad u kwai tyrkhong ba la ïoh ban kurup la aiti noh sha ki pulit jong ka Rongra ban leh ïa kaba donkam.
