Tehran/New Delhi, Jymmang 22 (UNI)
U Vice-President ka India, u Jagdeep Dhankhar ha ka Sngi Balang u la kynmaw burom ïa u President ba la khlad noh ka Iran, u Ebrahim Raisi bad Myntri ka tnat kam bar-ri, u Hossein Amir-Abdollahian ha Tehran ha ka jingïalang ba kyrpang kaba la long ban pynpaw ïa ka jingsngewlem.
U Dhankhar u la ïakynduh ruh ïa u Acting President ka Iran, u Mohammad Mokhber bad pynpaw ka jingsngewlem halor ka jingkhlad noh u President Raisi, Myntri ka tnat kam bar-ri, Amir-Abdollahian lem bad 6 ngut kiwei pat hadien ka jinghap jong ka ‘helicopter’ ha ka Sngi U Blei.
Hashuwa, ha ka jingleit jong u sha Tehran, ïa u Vice-President la pdiang burom da ki bor pynïaid ka Iran.
Ka jingthoh na ka ophis u Vice-President ha ka rynsan lad pathai ‘X’: U Vice-President, u Japdeep Dhankhar u la kynmaw burom ïa u President ba la khlad noh, u Dr. Seyyed Ebrahim Raisi, u Myntri ka tnat kam bar-ri ba la khlad noh, u Dr. Hossein Amir-Abdollahian lem bad kiwei-kiwei ki ophisar ka Iran ha Tehran mynta ka sngi.
“U Vice-President Dhankhar u la ïakynduh ruh ïa u Dr. Mohammad Mokhber, Acting President ka Iran bad phah ïa ki jingsngewlem,”
U nongaiktien ka tnat kam bar-ri u la thoh: “U Vice-President Jagdeep Dhankhar u la ïakynduh ïa u Acting President ka Iran, Dr. Mohammad Mokhber ha Tehran mynta ka sngi.
“U Vice-President u la phah ïa ki jingsngewlem halor ka jingkhlad ba kyndit jong u President Seyyed Ebrahim Raisi bad Myntri ka tnat kam bar-ri, H. Amir-Abdollahian.”
