Shillong, Jymmang, 22
Ka Meghalaya Biodiversity Board (MBB) ha ka Sngi Balang ka la rakhe ïa ka ‘International Day for Biological Diversity’ (IDBD) halor ka phang “Be Part of the Plan” ha U Soso Tham Auditorium, Shillong ha kaba u Chief Secretary ka Jylla, Bah D.P. Wahlang, u la long kum u kongsan.
Haba ai jingkren, u Bah Wahlang u la ong ba ki jingdon-jingem mariang ba don jingim ki long ka bynta ba kongsan ha ka ban pynneh-pynsah ïa ka jingim ha ka pyrthei.
U la ong ruh ba ka United Nations ka la pynbna ïa ka 22 tarik Jymmang kum ka ‘International Day for Biological Diversity’ (IDBD) ban kyntiew ïa ka jingsngewthuh jong babun balang halor ki jingdon-jingem mariang ba don jingim.
Ka Board ka la rakhe ïa ka IDBD ha ryngkat ka jingïasnohktilang bad ka National Biodiversity Authority (NBA) ba kynthup ïa baroh ki District Nodal Officer, ki Biodiversity Management Committee, ki khynnah pule na ki skul, kolej, bad skulbah bapher-bapher.
“Ka Meghalaya, kaba long shi bynta jong ka ‘Indo-Burma Biodiversity Hotspot’, ka riewspah ha ka jingdon jong ki syntiew ki skud bad ki mrad ki mreng. Ka jinglong-jingman jong ka jaka, khyndew bad ka suiñ bneng ka long kaba biang eh na bynta ki jait khlaw bapher-bapher,” u la ong.
U Chief Secretary u la ong ruh ba haba ïadei bad ka jingriewspah jong ki jingdon-jingem mariang (ba don jingim) bad ka jingtip tynrai kaba don bad ka Jylla, da kaba buh jingmut halor ki jingma ïa ki jingthaw ba don jingim bad ki sawdong-sawkun jong ki, la khmih lynti ba ka Meghalaya Biodiversity Board ha ryngkat bad ka tnad khlaw kan shim ïa ka bynta ba kongsan ban kynjoh ïa ka thong jong ka Biological Diversity Act and Rules.
U la ong ruh ba u sngewkmen ban pyntip ba ka Board ka la pyndep ïa ka kamram ha ka ban thaw ïa ki Biodiversity Management Committee (BMC) ha baroh 6459 tylli ki shnong bad 9 tylli ha ki jaka sor katkum ka jingdon jong ki shnong bad ki kynhun ha ki jaka sor ba la kdew ha ka Khana Samari ka India jong u snem 2001, 2011.
Nalor ka jingthaw ïa ki BMC; ka Board ka la pynkhreh ruh ïa ka People’s Biodiversity Register (PBR) na bynta baroh ki BMC bad ka kam ban kyntiew kyrdan ïa ki ka dang ïaid.
Na ka liang ka Board ka la pynlong ruh ïa ki prokram ai jinghikai ha baroh ki distrik jong ka Jylla katkum ki kyndon jong ka Biological Diversity Act, 2002 bad ka pyrshang ban pyntreikam ïa ki BMC ban pynsangeh ïa ka jingpom pathar ïa ki dieng bad ban pynneh-pynsah bad ïada ïa ki jingdon-jingem mariang ba don jingim.
Kiba bun ki BMC ki la treikam ba kynthup ïa ka Umru BMC kaba la ïoh ïa ka jingïaroh ba kyrpang na ka NBA bad UNDP ban ïada ïa ki ‘Amur Falcon’.
Kumjuh, kiwei pat ki BMC kum ka Kynton Massar BMC, Moolamylliang BMC, Aruakgre BMC, Umtngam BMC bad ki kynhun ka imlang-sahlang kum ka Seiñ Raij Khlo Blai Community Reserve, Chyrmang Community Reserve ki la ïoh khusnam ‘State Level Conservation Award’.
Shuh shuh ha ryngkat u kongsan, u Commissioners & Secretary, Forest & Environment cum Chairman, MBB, P. Bakshi. IAS, PCCF & HoFF, R.S. Gill, bad IFS, PCCF (Wildlife & Biodiversity), S.M. Sahai, ki la pyllait ïa ki ‘Poster’ bad ki kot halor ka ‘Biodiversity of Meghalaya’ bad sam ruh ïa ki khusnam sha ki nongjop jong ki jingïakob bapher-bapher ba la pynlong kum shi bynta jong ka jingrakhe.
