Dhaka, Jymmang 22 (UNI)
Uwei u MP na ka Ri Bangladesh uba la wan sha Kolkata, India ban phah sumar, u la duh noh ïa la ka jingim, bad ïa ka met kaba sah jong u, la lap na kawei ka ïing kaba don ha New Town ha Kolkata ha ka Sngi Balang.
Na ka liang u Myntri Korbar Ri ka Bangladesh, u Asaduzzaman Khan, mynta ka sngi u la ong ba ka jingshah pynïap jong u MP ka seng Awami League, u Md. Anwarul Azim Anar ha Kolkata, ka dei kaba la dep ban suhbuit lypa bad lai ngut ki briew ki la shah kem halor kane.
Hynrei u Khan u khlem treh ban batai bniah da kaba ong ba ka jingtohkit ka dang ïaid. Ïa kane, u Khan u la kren hadien ba la ïoh jingtip ba ïa ka met kaba sah jong utei u MP la lap na kawei ka ïing kaba don ha New Town, Kolkata.
“Ka jingtip kaba ngi la ïoh haduh mynta ka long ba ki nongshong shnong jong ka Ri jong ngi ki la donkti ban pynïap ïa utei u MP,” la ong utei u Myntri.
Ka khun jong utei u MP, ka Mumtarin Ferdous Doreen, ka la dawa ba ka dei ban don da ka jingtohkit ka bym shah liang halor ka jingïap u kpa jong ka ha Kolkata.
“Nga kwah ba kan don ka jingbishar hok halor ka jingshah pynïap jong u kpa jong nga. Ngi kwah ba ka jingtohkit kan long ka bym shah liang ban lap mano kiba la pynïap ïa u bad na kaei ka daw. Nga kwah ban ïohi ba kito kiba la pynïap ïa u kpa jong nga kin shah phasi.”
Na ka liang utei u Myntri u la ong ba ki pulit na Bangladesh bad Kolkata ki ïatreilang halor katei ka jingjia. Hynrei u la ong ba katei ka jingshah pynïap jong u MP kan ym ktah ïa ka jingïadei hapdeng ka Bangladesh bad ka India.
“Ngin sa pyntip halor ka daw jong ka jingshah pynïap, haei ka jingshah pynïap ka la jia bad mano kiba donkti,” la ong u Myntri.
Katkum ki khubor, la ong ba ki pulit ki la lap ïa ka met kaba sah jong u Md Anwarul Azim Anar, uba dei u MP ka Jhenaidah-4, na New Town, Kolkata ha ka Sngi Balang. La ong ba mynta u bnai hi, u la leit sha Kolkata ban shah sumar.
Ki don ruh ki khubor kiba la ïathuh ba ïa ka met jong utei u MP la ot lyngkhot-lyngkhai bad kane ka long katkum ka jingpyntip na u Deputy Commissioner ki pulit ka Kolkata. Une u heh pulit u la ong ruh ba ïa ka met la lap na kawei ka ïing kaba don ha Sanjeeva Garden ha New Town.
Mar ïa tip halor katei ka jingjia, da ki hajar ngut ki nongkyrshan ka seng Awami League ki la leit hakhmat ïing jong utei u MP ha ka konstitwensi jong u bad ki la dawa ba dei ban don da ka jingtohkit bniah halor ka jingshah pynïap jong u.
Shuh shuh katkum ki khubor, utei u MP u la wan na khappud Darshana-Gede sha India ban phah sumar ha ka 12 tarik Jymmang. Hadien kata, u la leit sha ka ïing sah jong u paralok jong u uba dei u nong India bad ïa uba la tip kyrteng kum u Gopal Biswas. Kane ka ïing ka don ha North 24 Parganas distrik ha West Bengal.
Ha ka sngi kaba bud, u la leit ban ïakynduh ïa u doktor bad u la dei ban wanphai ha ka por janmiet. Hynrei, la ong ba u la leit pynban sha nongbah Delhi bad u la phah ruh da ka jingtip sha u Biswas lyngba ka WhatsApp. Uta u MP u la ong ïa u Biswas ba un sa ïakren bad u lada u donkam. Hynrei naduh kata ka por, ym shym la ïoh shuh ban ïakren bad utei u MP.
Na ka liang u Biswas bad ki bahaïing hasem jong utei u MP ki la sngewkhia hadien ba ki khlem lah shuh ban ïoh ïakren bad u. U Biswas u la leit ai noh da ka jingujor sha ki pulit ha thanat Baranagar ha Kolkata ban pyntip ba utei u MP u la jah rngai.
Ha ka Sngi U Blei, na ka liang u para jong utei u MP, u Enamul Haque Iman, u la ai da ka jingujor sha ki pulit ka thanat Kaliganj halor ka jingjah u hynmen jong u.
