Shillong, Jymmang 22
Namar ka jingïohpdiang ïa ki jingujor ba ki ju don ki briew kiba ju leit shongkai sngewbha ha ryngkat ka ïa dih-bam sngewbha hapoh Dhankheti Point kaba dei ka jaka kaba ju pynïeng kali bad kaba don hajan ki dukan die jingdie ha ka por mynmiet, na ka liang ka Federation of Khasi Jaiñtia and Garo People (FKJGP) Malki Circle ka la pynlong da ka jingleit peitngor ïa kane ka jaka ban lap hi dalade ïa ki jingshisha.
Ha katei ka jingleit peitngor ka la lap shisha ruh ïa ka jingplie miet ki dukan die jingdie bad ki khynnah kiba wan ha katei ka jaka kim dei ba ki shu wan tang ban thied jingthied hynrei ki la wan ruh ban shongkai kaba la kylla long kum ka ktem ban ïadih-ïabam jongno-re-jongno ha ka por mynmiet-mynïong.
U President ka FKJGP Malki Circle, Bah W. Lyngdoh Mawphlang, u la ong ba ka seng ka la ïoh jingujor ruh ha kaba ïadei bad ka jingdon jong ki thuk-thuk arshaka kiba ju pynher bad leh ïa ki leh ïa ki ‘stunt’ lane ka jingñiah khyllew sap ha katei ka surok kaba don ha Dhankheti bad kane ka jingleh jong ki, ka wanrah ka jingsyier bad ka jingma kaba khraw ïa ki nongshong shnong, ki khyllung khynnah bad khamtam eh ïa ki briew kiba ïaid ba ïeng lyngba katei ka surok.
U Bah Lyngdoh Mawphlang u la ong ba ki khynnah kiba ñiah thuk-thuk kim dei ban ñiah laitlan than hynrei ki dei ban ñiah da kaba phikir bad long kiba adkar bha namar ka surok kam dei tang na ka bynta jong ki.
“Ka jingñiah thuk-thuk kaba laitluid bad laitlan jong kine ki khynnah samla jong ngi mynta ka buh jingma ïa ki briew kiba ïaid ba ïeng, ngim shim la khang ïa ki hynrei ka rukom niah ka dei ban long kaba phikir ym ban shu niah laitlan bad niah kulmar”, la ong u Bah Lyngdoh Mawphlang.
Shuh shuh u Bah Lyngdoh Mawphlang u la kyntu ruh ïa ka tnad pulit ba kan peitngor bha khamtam eh ha ka por mynmiet-mynïong namar ka jingñiah thuk-thuk bad kali ha kine ki por ka long kaba ishyrkhei bha bad kum ka tnad pulit kam dei ban shu ap khmih lynti ban leh ïa kane ka kam tang ïa ki sengbhalang.
“Na ka liang ka seng, ngi maham tyngeh ruh ba nangne shakhmat ngin sa dang ïai don beit ïa ka jingwan peitngor kaba kynsan ha ka por mynmiet kata ha kano-kano ka por ngin wan ban lap da la ki jong ki khmat ïa kaei kaba sniew bad kaei kaba bha,” la pynkut ka seng.
