Shillong, Jymmang 22
U General Secretary ka Khasi Students’ Union (KSU) Sengkmie, samla Donald Thabah, u la ong ki pulit ki thwet beit ïa ki dkhot ka KSU lada don kano-kano ka jingshah pynïap namar ka seng haduh mynta kam don kano-kano ka jingïadei bad ka sorkar.
Haba buddien ïa ki dkhot kiba la shah kem halor ka jingkynnoh ba shah pynïap ki bar jylla ha Ichamati bad ha Mawlai, u samla Donald u la pyntip ba ki don san ngut ki dkhot ka KSU kiba shah pharep ha ki pulit bad mynta la ïaid shibnai tam eiei ki dang ngat beit ha ka jingtohkit ki pulit.
U la ong ba ka KSU kam u don jingïadei bad kano-kano ka sorkar lada dei barim ne bathymmai, na kata ka daw ki pulit ki thwet beit ïa ki dkhot ka KSU lada don kano-kano ka jingshah pynïap ïa ki bar jylla.
“Kumta ka seng ruh kan ïakhun beit ban pyllait ïa ki dkhot kiba la shah kem namar ka dei tang ka jingkynnoh ki pulit” u la ong.
U la pyntip ba napdeng san ngut kiba la shah kem, saw ngut ki dkhot kiba dei na Sohra la pharep halor ka jingshah pynïap ki bar jylla ha Ichamati bad uwei u dkhot ka KSU na Mawlai la pharep halor ka jingshah pynïap ki nongtrei bar jylla ha Mawlai.
U la pynkynmaw ba ki pulit ki ju pynngat shibun ki jingkynnoh ïa ki dkhot ka KSU khamtam haba ïadei bad ka jingïakhih ILP bad kiwei de hynrei kim da peit than ïa kiwei pat ki seng.
U la ong ba wat la ki pulit ki thwet ïa ki dkhot ka KSU hynrei ka seng kan nym kynrandien ban ïada ïa la ka jong ka jaidbynriew rit paid.
