Shillong, Jymmang 22
Ka Hynñiewtrep Youths’ Council (HYC) ka la dawa na ka North Eastern Indira Gandhi Regional Institute of Health and Medical Sciences (NEIGRIHMS) ba kan pyndap ïa ki kam ba lait thylli da kaba pynlong biang ïa ka eksamin ym ban shu shim na ka ‘Waiting List’.
Kane ka jingdawa ka HYC ka la long hadien ba kum ka seng ka la dep ban ïoh jingtip ba haduh kumba 40 haduh 50 ngut ki briew kiba la shah thung kum ki Nursing Officers ha ka jingpynrung kam kaba la dep lyngba ka NORCET, ki don kiba khlem wan shimti ïa ka kam bad don ruh kiba la iehnoh kam, la ong u President ka HYC Bah Roykupar Synrem haba kren sha ki lad pathai khubor hadien ka jingïakynduh ïa u Director ka NEIGRIHMS ha ka Sngi Balang.
Kumta na ka liang ka seng ka ïai ban ïa katei ka jaka pule bad sumar ba kan shim kabu na kane, bad ba kam dei shuh ban pynlong ïa ka eksamin lyngba ka NORCET bad ba ym dei ruh ban shim na ka thup ‘Waiting List’ hynrei pynlong da ka eksamin bathymmai khnang ba kan plie lad ruh ïa ki samla trai jylla.
Ha kawei pat ka liang, u Bah Roykupar u la ong ba ka seng ka la pynpaw ruh hakhmat u Director ka NEIGRIHMS halor ka jingduna ka bhah pule doktor ka Meghalaya, ïa kaba u Director ruh u la kubur bad pynpaw ban sa pynkiew noh ïa ka bhah (quota) ym tang ha ka jingpule Doctor MBBS hynrei wat ha ka M.Sc Nursing bad B.Sc Nursing na ka bynta ki samla pule ka Meghalaya.
Une u nongïalam ka HYC u la pyntip ba haduh mynta ka Meghalaya ka ïoh tang 14 tylli ki bhah ban pule doktor MBBS ha kane ka jaka pule, ka Nagaland ka ïoh 10, ka All North East States ka ïoh 18 tylli bad ka All India ka ïoh 8 tylli. Lada kheiñ kyllum lang, ka NEIGRIHMS ka ïoh lypa 50 tylli ki seat ban pule doktor.
U Bah Roykupar u la ong ba katkum ka jingïohi halor kane ka bhah jong ka Meghalaya, la i ba ka long kaba dang duna namar ka Jylla kam pat don ki Medical College katba kiwei ki Jylla kum ka Nagaland, Mizoram, Arunachal Pradesh ki la sdang ïa la ki Medical College naduh 2023.
U la ong ba ha kane ka jingïalang, na ka liang u Director ka NEIGRIHMS u la ïathuh ba ka bhah pule doktor MBBS hapoh kane ka jaka pule naduh mynta u snem kan nym dei shuh tang 50 tylli ki Seat hynrei yn pynkiew noh haduh 100 tylli ki Seat bad kane ka mut ba ka bhah jong ka Meghalaya ruh kan long arshah.
Haba ïadei bad ka bhah pule M.Sc Nursing bad B.Sc Nursing, u Bah Roykupar u la pyntip ba haduh mynta kam pat don ka jingbhah lypa na ka bynta ki samla pule ka Meghalaya.
U la ong ba ka NEIGRIHMS ka ju pynlong ïa ka All India Exam ban rung klas pule M.Sc Nursing bad B.Sc Nursing da kaba shim na kito kiba lah bha ïa ka eksamin NEET.
“Kane ka buh jingeh ïa ki samla pule ka Meghalaya bad namar kane ka HYC ka la dawa ban bhah kyrpang ïa ki samla ka Jylla ban ïoh pule M.Sc Nursing bad B.Sc Nursing hapoh kane ka jaka sumar,” u la ong.
Ha kaba ïadei bad kane, u Bah Roykupar u la ong ba u Director ka NEIGRIHMS u la ïathuh ba ka bhah pule B.Sc Nursing hapoh kane ka jaka sumar mynta u snem kam dei shuh tang 50 tylli ki Seat hynrei kan dei 100 tylli ki Seat bad ka Academic Council jong ka NEIGRIHMS ka la tyrwa ban mang lypa 30 tylli ki Seat na ka bynta ki samla pule ka Meghalaya
