Jowai, Jymmang 23
Ka umbam-umdih kaba sam sha man la ki thliew ïing ha sor Jowai da ka tnat PHE ka la long da ka umktieh bad kane ka dei na ka daw jong ka jingpyntuid ne bret khyndew da ka Ms Dhar Company sha ka wah Myntdu kaba don ha Mupiah.
Ha kaba ïadei bad kane, ka Khooid ïa ka Wah Myntdu (KWM) da ka jingsngewkhia halor ka jingkylla rong ktieh ka wah Myntdu ha kine ki sngi na ka jinghiar u slap kumjuh wat ha ki sngi ba rang ka bneng kaba la ktah bad buh jingma ïa ka jinglong jingman ka umbam umdih jong ka tnat PHE kaba sam ha man ki thliew ïing ha sor Jowai, ha ka Sngi Palei hapoh ka jingïalam u President Ma Khroo L Pariat ryngkat ka jingsynran ki waheh shnong ka sor Jowai, ki seng longkmie ki la pynlong ka jingleit jurip ïa ka jaka pynlang um ka tnat PHE (Electrical) kaba don ha Urkhla bad kila ïakynduh ruh ïa u Ma Roskil Challam, SDO- PHE, Electrical Division.
Ha kane ka jingleit jurip la sakhi ba ki nongtrei ka PHE ki dang ïa bun kam ha ka ban pynkhuid pynsuba ïa ki bynta jong ka jaka pynlang um namar ba ka um ba tan ha katei ka jaka kam long shuh kaba khuid namar ka jingkylla um ktieh ka wah Myntdu kaba don ha Mupiah.
Ha kaba ïadei bad ka jingkylla um ktieh jong ka wah Myntdu, ka seng Khooid ïa ka wah Myntdu kala lap ba ka khyndew kaba pyntuid na ka jingshna ïa ka surok dei ka M/s Dhar Construction Company kaba pynktieh ïa ka um.
Ka seng Khooid ïa ka Wah Myntdu ka pynpaw ka jingsngewrem ban ïohi ba ki bor sorkar ba pynïaid ïa ka district kumjuh ka JHADC ne ki bor ba dei ban ïada ïa ka Wah Myntdu kim shimkhia ban leh ïa kaba donkam katkum ka hukum ba la kdew da ka NGT halor ka mukotduma kaba la ujor da u Ma Sajay Laloo pyrshah ïa ka sorkar jylla.
Ka seng ka la ong ba ka rukom pyntuid khyndew ka long kaba laitlan ha shilynter ki bynta ba shna ïa ka surok bathymmai ban poi sha Treiongriang ba ïaid lyngba ka wah Myntdu.
Ka la pynkynmaw ruh ka la dep ban ujor bad ai jingmut ruh ïa u Deputy Commissioner kumjuh ïa u EE PWD Jowai Central division Jowai bad ki la dep ruh ban jurip ryngkat ki majistor, ki ophisar sorkar naduh 2021, por ban pynheh ïa ka surok thymmai.
Ka seng ka pynpaw ruh ka jingbynñiaw ïa ka shnong Jowai bad ki marjan shnong khamtam ïa kito kiba shaniah umbam umdih, umsait um khlieng na ka tnat PHE, ki bym kot bor ban thied umbam umdih kumjuh ïa ki nongrep kiba don hali hator na ka sha ka diang sha ka mon jong ka wah Myntdu bad kaba la buh jingma wat ïa ka rep ka riang, ka thung ka tep jong ki lada kumne beit kan long ka wah Myntdu.
Ka Khooid ïa ka Wah Myntdu ka ai ruh ka jingïaroh ïa u SDO-PHE, Electrical Division kumjuh ïa ki nongtrei kane ka jaka pynlang um ha Urkhla kiba la trei shitom na ka bynta ban pynïoh ïa ka shnong Jowai ïa ka umbam umdih kaba khuid wat la hapdeng ka jingtynjuh kaba khraw.
Ha kane ka sngi la don lang ruh Ma A Lamare Waheh Chnong, u Ma JM Pohsngap Symbud Waheh Chnong Khimusniang, u Ma M Challam Waheh Chnong Loomïongkjam, Ma O Shylla General Secretary Chilliang Raij bad kiwei kiwei ki ‘riew rangbah ka shnong Jowai.
