Shillong, Jymmang 23
Hadien ka jingleit pynpra ïa ki ïing ba la kynnoh shna be-aiñ ha Lum Survey ha ka step Sngi Palei, ki nongïalam jong ka Hynñiewtrep Youths’ Council (HYC) ki la shah pynngat da ka mukotduma (case) ha ki pulit ka East Khasi Hills.
Ïa kane ka mukotduma pyrshah ïa ki nongïalam ka HYC ki pulit ki la dep ban pynrung ha thanat Sadar. Ki nongïalam ka HYC kiba la shah pynngat mukotduma ki kynthup ïa u President Roy Kupar Synrem, Vice President Donbok Kharlyngdoh, Assistant General Secretary Isaac Basaiawmoit bad bun kiwei ki bym tip kyrteng.
Hadien ba la dep ban pynrung mukotduma, ka jingtohkit mynta ka la ïaid shaid-shaid halor kane ka jingjia.
Ha kawei pat ka liang, u Deputy Commissioner (DC) jong ka East Khasi Hills u SC Sadhu, u la ong ba kane ka jingleh jong ka HYC ban leit pynpra ïa ki ïing ha Lum Survey ka la pynkit ïa ki bor jong ka aiñ.
U DC u la ong ba mar ïa ïoh jingtip halor kane na ki pulit u la phah ïa u majistor ban leit sha katei ka jaka ban peit bad khmih. U la ong ba kane ka jingleh ha ka jingshisha kam dei ban long namar ka jingïakren ka la ïaid shakhmat bad ki briew ka Defence Estate namar kane ka dei ka jaka jong ki, bad kam dei satia jong ka sorkar.
U DC u la buh ruh ka jingkyrpad ym tang sha ka HYC hynrei sha baroh ba kim dei satia ban shim ïa ka aiñ ha kti hynrei haba don jingeh dei ban wan ban ïakren. U la pyntip ba halor katei ka jingjia, ka aiñ kan trei la ka jong ka kam bad kan nym don jingmap ïano-ïano ruh.
U DC u la pyntip ba hadien ba la dep ban hiar jurip sha katei ka jaka ha kine artaïew ba la dep, na ka liang ki bor district ki la pynkhreh ïa ka kaiphod bad ba la shimkhia ïa kane ka kam bad ka jingïakren ki bor district bad ka sorkar ka dang ïaid shakhmat kaba la jan poi ruh sha ka jingïasngewthuh jingmut, hynrei kane ka jingleh jong ka HYC ka lah ban buh jingeh bha ïa kane ka kam.
