Shillong, Jymmang 23
Ki dkhot ka Hynñiewtrep Youths’ Council (HYC) ha ka nohphai sngi jong ka 23 tarik u Jymmang, ha ka jingbteng ban leit khynra drok kaba kyndit-kynsan ka la ïoh ban bat biang ïa ki 4 ngut ki nongdih drok kiba dang muja ban dung thyrnia drok ha khrum jong ka Stand Bhoi ha Garikhana.
Kitei saw ngut ki khynnah kiba la ïoh bat da ka seng ki dei ki samla Khasi. Ki la leh ïa kane ka kam ha katei ka jaka paidbah khlem don satia ïa ka raiñ ka rem wat haba ka dei ha ka por mynsngi mynshai kaba ki paidbah nongïaid-nongïeng ki dang ïaid sharum-shaneng.
Kitei ki samla ki dei ruh kiba ju sah miet ha kane ka jaka bad ban pynlong ruh ïa katei ka jaka kum ka jaka ban ïadih drok bad na kitei ki samla la ïoh ban kurup ïa u drok, u kynja, ki thyrnia injek bad ki tiar pynmynsaw.
Ha ka jingkylli tohkit bniah da ka seng na kitei saw ngut ki samla, ki la ïathuh ba don napdeng jong ki kiba la pyndonkam ïa u drok la kumba hynriew snem bad saw snem eiei bad ki don ruh pat kiba dang shu sdang pyndonkam dang kumba hynriew bnai eiei.
Kitei ki khynnah ki la phla ruh ba ki ju mlien ban tuh ïa ki tiar ki tar na la ïing la sem naduh ki jaiñ ki nep, ki juti bad kiwei-kiwei ki tiar ban leit die khnang ban ïoh pisa ban thied drok.
Ki la ïathuh ruh ba ïa ka pisa ban dih drok ki ju pan pisa na ki kmie ki kpa da kaba ki ju thok ruh ba ki leit ban thied dawai bad ki ju donkam T. 300 shisngi ban thied ïa u drok.
Shuh shuh kitei ki samla ki la pynpaw ruh ha ka seng ba ki kwah ban kylla noh bad ban leit shong ha ki jaka ai jingsumar ne ki ‘Rehabilitation Centre’ hynrei namar ka jingrem eh kumta kim lah satia ban leit sha kitei ki jaka.
Na ka liang ka seng ka la thang noh ïa ki thyrnia injek drok, u kynja ha katei hi ka jaka.
