Shillong, Jymmang 23
Ka jingdheng ki kali ha shilynter ka surokbah Shillong-Guwahati namar ka jingmaramot ïa ka jingkieng ha Dam Umïam ka la kylla long ka jingban beiñ ïa ka mariang ha kaba ki briew kiba sahkut ha ka dheng kali ki la bret pathar ïa ki plastik bad kiwei kiwei ki jaboh-jabaiñ ha shilynter ka surok naduh View Point shaduh Umïam.
Ka jinglong khlem akor ki briew bad bym burom ïa ka mei mariang ka long hadien ba ki la thied ïa ki jingbam na kiba tyrwa ha shilynter ka surokbah bad ynda ki la dep bam ki bret ïa ki song plastik bad ki kot song shana bad jingbam ba song plastik khlem jingsalia.
Ha shilynter kane ka surokbah ki don ruh ki nongdie jingdie ha kaba ki briew kiba sahkut ha ka dheng kali ruh ki thied ïa ki soh ba song ha plastik, shana khleh ba song ha kot nalor ka sha ha pela kot.
Ynda la dep bam, ki bret ïa ki plastik bad ki kot ha shilynter ka surok bad kito kiba dih sha ki bret ïa ki pela kot khlem jingkitkhlieh ban sumar ïa ka mei mariang.
Hynrei wat hapdeng kum kine ki jingleh bym salia ïa ka mei mariang, ki dang don pat ki briew kiba don ka mon babha bad jingkitkhlieh ban pynkhuid ïa kine ki jaboh jabaiñ kiba la bret pathar ha shilynter jong ki rud surok bad nala naduh View Point shaduh Umïam.
La ïohi ba ki don ki kynhun kiba da ka mon sngewbha ki la mih ban pynkhuid bad ki don ruh ki nongdie jingdie kiba ïashimbynta lang ban pynkhuid.
Ka don ruh kawei ka kynhun Tornado ha kaba ki dkhot jong ka ki la mih ban sar bad tam ïa ki plastik kiba la satah ha shilynter jong kane ka surokbah namar ka jingbret pathar man la ka sngi da ki briew kiba shong kali ha ka por ba ki sahkut ha ka dheng kali.
Ki briew kiba leit jingleit na Shillong bad kiba wan sha Shillong ki hap ban sahkut ha ka dheng kali bun kynta man la ka sngi namar ka jingbteng ki kam ban maramot ïa ka jingkieng Umïam. Kine ki briew ki hiar na kali bad pynlut por ban shongkai harud surok bad bam ki jingbam kiba song plastik bad bret kat shaba lap.
