Shillong, Jymmang 23
Ki nongïalam bad dkhot jong ka Hynñiewtrep Youths’ Council (HYC) Sengkmie ki la hiar hi da lade sha Lum Survey ha ka Sngi Palei ban pynpra lut ïa baroh ki ïing ba la shna bad pynïeng be-aiñ da ki bar jylla kiba sah ha kane ka jaka.
Kane ka jingleit ki nongïalam bad dkhot ka HYC ban pynpra noh ïa ki ïing kiba la kynnoh shna be-aiñ da ki bar jylla kiba la pynkylla ruh kum ka ‘slum area’ ïa ka jaka jong ka Defence Estate Office (Guwahati) kaba don ha Lum Survey, Shillong, ka long hadien ba na ka liang jong ka Sorkar kam shym la leh eiei ne ban ai kano-kano ka jubab.
La ïoh ban sakhi ba ki nongïalam bad ki dkhot ka HYC ha katei ka step ha ryngkat u tyrnem, lyngka bad kiwei ki tiar ki la hiar sha kane ka jaka ban pynpra lut ïa baroh ki ïing kiba don kumba 80 haduh 100 tylli eiei ïa kiba la kynnoh ba la shna be-aiñ da ki bar jylla.
Ha shwa ban pynpra ïa kine ki ïing, ki nongïalam ka HYC ki la phah mih lut ïa baroh ki briew kiba sah ha kane ka jaka da kaba suk bad ban lum ban lang lut ïa ki tiar ki tar bad ki jingdon-jingem jong ki, khlem da don ka jingjrong kti ne ka huri-hura hynrei baroh ka la ïaid beit jai-jai.
Lah ban pynkynmaw ba ka HYC ka la dep ban hiar jurip ïa kane jaka mynta la don shi bnai eiei. Nangta ha kine ki artaïew ba la dep, ka la don ruh ka jinghiar jurip da ki bor pynïaid district lem bad ka Municipal Board, ki pulit bad kiwei bad ka HYC, ha kaba ki la lap da la ki khmat ïa kiei-kiei baroh.
Shwa kane, ka MeECL ruh ka la leit ban ot lut ïa ki bording ilektrik jong kine ki ïing hadien ka jingïoh pdiang ïa ka jingujor na ka HYC bad ka jingshem ruh da lade ba kine ki ïing ki la shu ring tuh ïa ka bording khlem da ïoh jingbit.
Ha kane ka jingpynpra ïa ka ïing, la ïohi ba ki dkhot ka seng ki la trei shitom khlem shongthait ban pyndep ïa ka jingpynpra bad ha kajuh ka por ban maham lypa ruh ïa kine ki briew ba ki dei ban mih shi syndon na kane ka jaka ym ban nang wan phai ne shong biang hadien habud.
Haba kren sha ki lad pathai khubor hadien ba la dep ban pynpra, u President ka HYC u Bah Roykupar Synrem u la ong, ka jingmih jong ka HYC ban pynpra ïa kine ki ïing ba la shna be-aiñ, ka dei namar ka jingbym leh eiei na ka liang ka Sorkar bad ki bor pynïaid district wat hadien ba ki la lap hi da lade.
“Ngi la dep ban dawa ba dei ban pynkhuid noh ïa kane ka jaka, hynrei na ka liang ki bor pynïaid district ki la shu sngap jar bad khlem leh eiei bad wat haba ngi pyrshang ban kylli ruh, kim ai satia ka jubab. Kumta ngim banse ban shim hi noh ka rai ban hiar hi da lade ban pynpra lut ïa kine ki ïing ba la shna be-aiñ,” la ong u Bah Roykupar.
U la ong, ka jingmih mynta ka sngi ban pynpra ïa ki ïing bad pynkhuid ïa kane ka jaka, ka long hadien ba ka seng ka la ïoh jingtip ba ki nongkhaïi drok ki la wan phai biang kata hadien ba ki la phet shipor haba wan hiar jurip ka sorkar.
“Kane ka jaka ka la long kawei na ki jaka pdeng jong ki kam khaïi drok, kaba la pynjot bad pynngop ïa ki khun samla ki jong ngi, kumta kum ka seng kaba dang ïakhun pyrshah ïa u drok, kam banse ban pyni noh da ka kam,” u la ong.
“Ngim kwah ban shu heh tang ka ktien hynrei ban pyni syndon da ka kam bad ngin nym ailad satia ïano-ïano ban shong be-aiñ ne tei ki jingtei be-aiñ,” la ong utei u nongïalam ka HYC bad kynthoh ruh ïa ka Sorkar kaba khlem leh eiei wat la ka la tip ba ki shong be-aiñ,
“Ngi ju ïohi ba na ka liang ki bor district kim ju pynslem ban hiar leit kyndang ïa ki paradoh parasnam ki jong ngi haba ki tam pud ha ki jaka sorkar, ha kaba ki ju ïalam da ka JCB ne puh shilum ban kyndang naphang, hynrei hangne pat wat la ki la tip shai ba ki dei ki briew kiba la shu shong be-aiñ ruh kam shym la leh eiei,” la ong u Bah Roykupar.
