Shillong, Jymmang 23
Ki dukan jong ki bar jylla kiba don ha shi lynter naduh lad Lum Survey ter ter shaduh Motphran ki la khang khyrdep lut ha ka Sngi Palei hadien ka jingïaid paidbah jong ki dkhot ka HYC naduh Bimola shaduh Motphran.
Ha kane ka sngi, ki nongïalam bad ki dkhot ka HYC hadien ba ki la dep ban pynpra ïa ki ïing ba la shna be-aiñ ha Lum Survey, ki la mih na kane ka jaka ha ryngkat ki lama ban ïaid paidbah sha Motphran.
Ki bar jylla kiba don dukan ha kane ka thaiñ haba ki la ïohi ïa kane, ki la syier bad sheptieng bad kumta mar-mar ki la pynsted la ki kti ki kjat ban pynhap ïa ki ‘shatter’ ne ki jingkhang bad ban lum ban lang lut ïa ki mar ki mata ban thep shapoh ki dukan.
Na ka liang ki nongïalam bad ki dkhot ka HYC kiba la ïaid bad kiew sha Motphran ki la ïaid beit jai-jai ha ryngkat ka jingpyrta ‘Tur Shaphrang Shipai ka Ri, Ngin ym sangeh ngin ïai ïaleh,’ haduh da poi ha Motphran bad pynbud pat da ka jingïalang ba lyngkot.
Haba ai jingkren ha Motphran, u Vice President ka HYC Sengkmie u Bah Donboklang Kharlyngdoh haba ai khublei ïa ki para dkhot kiba la wan na kylleng u la ong, “Ka HYC kan ïeng ïaleh beit haba shit ba shai bad na ka bynta kane, ka donkam ïa ka jingïatylli ban lah pat ban rat dyngkhong ïa ki kam be-aiñ.”
U la ong ba ka jingleit pynpra ïa ki ïing be-aiñ ha Lum Survey, ka long namar ba katei ka dei ka jaka kaba pynmih bun ki nongkhaïi drok kiba pynshong syier pat ïa ka imlang ka sahlang.
U la ong, “Lada ka sorkar ka dang ai kata ka jingïada ïa ki bar jylla ha kawei ka sngi da ngi wan, ngim wan shuh da ka kti hynrei da ki tiar kata da u khnam ka ryntieh, ka wait bad ka stieh ngin rah ban pynthikna ba kane ka jaka ka dei ka jaka jong u hynñiewtrep. Ïa kiba shong be-aiñ ngin kynther beit naphang na ka ri jong ngi.”
U Bah Donboklang u la ong, “Ngi la dep ban dawa na ka sorkar ban pynkhuid noh ïa kane ka jaka, hynrei ka la pynslem bad kane ka long kumba ka ibeiñ ïa ka HYC kaba long ruh ba ka ibeiñ ïa ka jaidbynriew jong ngi. Ka Sorkar ka nongïada ïa u poiwir poiar, ha Lum Survey la shong be-aiñ da u mynder, lada dei ba shong da u Khasi, naduh mynno ka la beh bad kyndang nokot nokot.”
