Shillong, Jymmang 23
Ka jingbym shah shuh ban ïaid ki kali heh naduh ki bos haduh ki trok na jingkieng Umïam namar ka jingmaramot kaba la ïaid mynta la hynriew bnai kynthih ka jingduhnong pat ka long sha kiba im kamai jakpoh da kaba shong dukan bad shim bai ïeng kali ha Inter State Bus Terminus (ISBT), Shillong kaba don ha Mawlai Mawïongrim.
Ha ka jingjurip u nonglum khubor U Nongsaiñ Hima ïa katei ka jaka ïeng bos ba wan kit ïa ki paidbah na kawei ka jylla ka la kynjah namar ka don satang ki bos jong ka MTC bad tang kawei ka bos ba wan na Arunachal Pradesh kaba ïaid na Mawryngkneng. Katba kiwei ki bos ki la wan buh bad shaw ïa kiba shong kali hakhmat ka Umïam Police Station kaba don hajan ka Lad Umroi namar bym shah shuh ban kiew sha Shillong katba nang ïaid ka jingmaramot ïa ka jingkieng Umïam.
Ha kane ka jingjurip la ïohi palat 18 tylli ki dukan sha, ki dukan die tiar thaiñ, ka dukan die dawai bad restaurant ki la khang lut namar bym don briew shuh ban wan bam.
La ïohi ruh ïa ka jingthylli ki jaka shim pisa kiba don palat 12 tylli hynrei la plie tang 2 tylli ban ai tiket ïa kiba shong bos MTC kiba leit buh briew sha Tura bad ai tiket ïa ka bos Arunachal Pradesh.
Kaba pynduhnong shuh shuh ka dei ïa kiba khrong bai ïeng kali namar kim shym la lah shuh ban kyrshan ïalade namar bym don bos kiba wan sha ISBT.
Kum ban shu pynkynmaw, ïa kane ka ISBT la plie da u Amit Shah uba dei u Myntri ka Sorkar India bad peit ïa ka tnat Pohïing ha ka 24 tarik Naitung 2021 ha ka jingïadonlang u Conrad K Sangma kum u Myntri Rangbah ka Jylla, u G Kishan Reddy u Myntri ka Sorkar India uba peit ïa ka tnat DONER, u Bah Prestone Tynsong kum Symbud Myntri Rangbah ka Jylla, u Bah Sniawbhalang Dhar kum u Myntri ka tnat Transport ka Sorkar Jylla.
Ka jingmaramot ïa ka jingkieng ha Umïam ka la sdang naduh u Nohprah 2023. Hynrei haduh mynta u Jymmang 2024 la sngewthuh ba kan dang slem namar ki hap ban khlong ïa ka surok rong bad thep bujli da ka dewbilat khnang ba kan skhem. Kane ka la pynlong ruh ban dheng kali kaba jur hapdeng ki kali kiba kiew bad hiar na Shillong man ka sngi.
Haba ïakren bad uwei uba shim pisa bai ïeng bos, u la ong ka jingbym wan shuh ki bos ka la ktah shisha ïa ka kamai kajih namar mynta u la hap ban shong tang marwei namar mynshwa ki don ar ngut.
U la ïathuh ba ïa ki kali sorkar kim ju shim pisa hynrei tang ïa ki bos kiba wan nabar ka jylla bad ki kali shimet.
