Shillong, Jymmang 23
Ka Sorkar Jylla lyngba ka tnat Social Welfare ka la nang aibor shuh-shuh ïa ka Khasi Hills Autonomous District Council (KHADC) ban ai jingithuh shwa ma ka ïa kino-kino kiba kwah ban ïoh ïa ka syrnot Scheduled Tribe (ST) ha kaba ka Sorkar lyngba u Lat ka Jylla ka la mynjur ban pynkylla ïa ka Sl 7 jong ki kyndon kiba ïadei bad ka jingpdiang bad jingpyndep ïa ki aplikeshon kiba phah sha ki bor ba dei khmih na ka bynta ban ai syrnot Scheduled Tribe.
U Myntri ka tnat Social Welfare, Bah Paul Lyngdoh, u la ong ba ha ka jingpynkylla (amendment) ïa ka Sl 7 jong ki kyndon kiba ïadei bad ka jingpdiang bad jingpyndep ïa ki aplikeshon ban ai syrnot Schedule Caste bad Scheduled Tribe hapoh ka Jylla Meghalaya ba la pynmih katkum ka Office Memorandum kaba 19/03/2014, la pynrung sa kawei ka kyndon nalor kaei kaba la buh ha ka kyndon kaba rim.
“Ngi la pynrung sa kawei ka kyndon kaba ong, ba kawei na ki jingdonkam ka kynthup ïa ka Tribe Certificate na ki bor ba dei khmih na ka bynta ki jaka ba hap hapoh ka KHADC ba kan long kongsan noh namar kane kam shym la don baroh shikatta wat la ka Tribe certificate ba ai da ka KHADC, ka dei ka kot kaba la ithuh da ka aiñ.
Kumta u Bah Paul u la ong ba kino-kino kiba kwah ban pynrung kyrteng ïalade lane kam lane kwah ban pynrung kyrteng bad ban ai ïa ka syrnot ST, ki dei ban don shwa ïa ka Tribe certificate ba la ai da ka KHADC katkum ka kyndon ba la buh.
Katkum ka jingpynbna kaba la pynmih, la ong ba ki kot ki sla ba la buh na ka bynta kine ki kam, dei ban ai lang ïa ka ‘Caste identity’, Caste certificate jong u Kpa/Kmie bad ka sakhi ïa ka jingïadei snam snam, ka kopi jong ka pata barim ba pyni ïa ka kyrteng ka Jaitbynriew ha ka kot.
Nangta la la ong ruh ba kino-kino ki kot ki sla ba ïoh na ka Sorkar ban pynshisha ïa ka ‘Caste identity’ bad ka Tribe certificate na ki bor ba dei khmih na ka bynta ki jaka kiba hap hapoh ka Khasi Hills Autonomous District Council (KHADC) ka dei kaba kongsan.
