Nongpoh, Jymmang 23
Ka jingieid bad ka jingburom ka jong ki paidbah ka thaiñ Raid Nongtung ïa u Myntri Rangbah barim ka jylla, u Bah E.K Mawlong (bam kwai ha dwar U Blei), ka long shisha kaba kham ñiar ban sakhi.
Ïa kane ka jingburom la ïohi ha ka Sngi Palei ha ka jingïakhun phainal jong ka lympung ïalehkai phutbol ba la pynlong da ka Mawlasnai Sports Club bad ïa kaba la ai nam ‘EK Mawlong Memorial Trophy’.
Kane ka jingieid bad ka jingïaburom markylliang jong ki paidbah ka thaiñ Raid Nongtung bad u Bah Mawlong ka la paw haba ki nongïalam jong ka Mawlasnai Sports Club ki la ïathuh ïa ka jingnoh synñiang jong une u nongïalam sha kane ka thaiñ ha ka por jong ka jinglong nongmihkhmat ka jong u kum u MDC naduh u snem 1972 bad kum u MLA naduh u snem 1978 ter-ter.
Kitei ki nongïalam jong ka Mawlasnai Sports Club haba pyrto ïa ki kam jong u Bah Mawlong, uba la long kum u MDC bad MLA ka Umroi konstitwensi la bun snem. Ki la pynpaw ba kum u nongïalam jong ka Umroi konstitwensi ha kito ki snem, u la noh synñiang shibun ha kaba ïadei bad ki kam pynroi jong ka thaiñ naduh ka jingpynïoh ïa ka Mawlasnai PHC ha u snem 1989 kaba la pynim ïa shibun ki mynsiem briew, ka Police Outpost ha u snem 1991, ka surok PWD, ka shlem treikam jong ka Veterinary kaba ki paidbah kim lah ban mutdur ban don kum kata ka jaka ai jingsumar ïa ki mrad ruh ha kito ki snem bad kiwei kiwei ki kam pynroi.
Shuh shuh kitei ki nongïalam ka Mawlasnai Sports Club ki la kdew ba kawei na ki kam kiba u Bah Mawlong u la noh synñiang kaba kum ki paidbah ka thaiñ kim lah ban klet ka dei ka jingpynthied ïa ka jaka na ka bynta kito ki ïing ki bym don jaka puta ba kin ïoh ban shong ban sah, ban seng ïa la ka longïing-longsem, bad sdang ban ïeng ha la ki jong ki kjat wat hapdeng ka jingduk jingkyrduh bad ki jingeh kiba bun, hynrei une u rangbah uba la ïohi jngai, u la dep ban ïohi lypa ïa kine ki jingeh kiba ki paidbah kin ïakynduh.
Kitei ki kam kiba une u nongïalam u la leh kyrpang ïa ka thaiñ Raid Nongtung kaba u don ïa ka jingieid kaba kham pher bad kham jan, ka la pynlong ïa ki nongshong shnong ba kin ïai pyrto junom bad ba kin don ïa ka jingburom kaba markylliang kaba wat ki khun ki kti jong utei u rangbah ruh ki lah ban sakhi haduh mynta-mynne kumba la ïohi ïa ka jingpynlong ïa ka lympung ïalehkai phutbol kaba la ainam ‘EK Mawlong Memorial Trophy’ ban pynsah nam ïa ki matti kiba une u rangbah u noh sha kane ka thaiñ kaba ki paidbah ki kynmaw kyndiang haduh mynta-mynne.
U Bah Mawlong, wat la u dei uba wan na ka longïing kaba shem jingeh bad jingjynjar, hynrei u dei u briew ba don ïa ka mynsiem ba shynrang bad uba thrang bad angnud ban kiew shaphrang ha ka jingim da ka jingtrei shitom bad trei minot thop ban thom ïa ki jingeh kiba wan lynshop ha ka jingim ka jong u bad ba u dei u briew uba trei jar-jar khlem da pyrto ïalade kaba ki paidbah katei ka thaiñ ki ong ba u dei u briew uba trei ïa ka kam bad duna ka ktien.
“Kat kine ki jingpynroi i la wanrah ha ka shnong jong ngi, hynrei im ju da kham tied bom shano-shano. I trei jar-jar, ki kam jong i ki kham sawa bun shah ban ïa ka ktien,” la ong kitei ki nongïalam ka Mawlasnai Sports Club.
Kum ban shu ïathuh khyndiat, ïa u Bah Mawlong la kha ha ka 1 tarik Rymphang, 1946 ha ka shnong Mawmih, East Khasi Hills. Naduh ka por ba u dang rit, u Bah Mawlong u la don ka jingthrang ban pyndep ïa ki jingpule ba kham shalor bad ñiar eh ki samla Khasi ha kito ki por kiba don ka jingthrang bad jingangnud kum ma u, la ong ki nongïalam ka Mawlasnai Sports Club da kaba bynrap ba wat la bun ki jingeh jingjynjar kiba u la ïakynduh ha ka jingim, hynrei ka mynsiem ba shynrang ka thom bad ka tur ïa ki jingeh.
Ki la ïathuh ruh ba u Bah Mawlong u la lah ban pyndep ïa ka jingpule Bachelor of Science (BSc) na St. Anthony’s College, Shillong ha u snem 196. Kane ka jinglah jong u ban pass ïa kane ka jingpule ka kylla long ka jingkyrkhu ym tang ïa ka ïing ka sem, hynrei ïa ka jylla hi baroh kawei. Hadien ka jingpyndep ïa ka jingpule, une u rangbah u la leit ban hikai ha St. Dominic Savio High School, Mawkhar naduh u snem 1968 tad haduh u Jylliew 1971, kata ha shwa ban un leit ban jam pat sha kawei pat ka jylli shakri paidbah ban long kum u nongmihkhmat jong ka Umroi konstitwensi.
Kitei ki nongïalam ka Mawlasnai Sports Club ki la ong ruh ba lada ka thaiñ Mawlasnai jong ka Raid Nongtung ka long mynta kumne kumba ka long, ka dei lyngba ka jingnoh synñiang jong u Bah Mawlong. Ki la ïathuh ba wat ïa ka madan ïalehkai jong ka Mawlasnai ruh ka dei kaba la pynïoh da utei u rangbah ha ka por jong ka jinglong nongïalam ka jong u.
Halor kitei ki synñiang kiba une u rangbah nongïalam u la noh synñiang sha ka imlang ka sahlang ka thaiñ Raid Nongtung, kitei ki nongïalam ka Mawlasnai Sports Club ki la pynpaw ïa ka jingsngewnguh. Ki la ong ruh ba kane ka ‘E.K. Mawlong Memorial Trophy’ kaba ki la pynlong kam dei satia ka tamasa jongno-re-jongno, hynrei ka dei ka lympung kaba ki kwah ban pynpaw bad pynsah jingkynmaw kyrpang ïa u Bah Mawlong uba la noh synñiang shikatdei eh sha ka thaiñ kum ka dak jong ka jingieid bad jingburom ïa u bad ïa ka ïing ka sem jong u.
