Shillong, Jymmang 23
Kum shi bynta ban pynneh ïa ka shongsuk-shongsaiñ bad ban tem ïa kino-kino ki huri-hura kiba lah ban mih ha ka sngi ñiew ‘vote’ jong ka ilekshon MP, u District Magistrate ka East Khasi Hills District ha ka Sngi Palei u la pynjari da ka kyndon 144 CrPC ban khang pyrshah ïa ka jingïaid paidbah ha East Khasi Hills District.
Lah ban kdew ba hadien ba la dep ban thep ‘vote’ kaba la sdang naduh ka 19 tarik Ïaïong, 2024 hapoh ka jylla bad ha kiwei ki bynta jong ka ri ka ban kut ha ka 1 tarik u Jylliew, ka jingñiew pat ïa ki ‘vote’ jong ka ilekshon sha Lok Sabha 2024 kan long ha ka 4 tarik Jylliew, 2024.
U District Magistrate ha ka hukum kaba la pynmih u la ong ban pynneh-pynsah ïa ka shongsuk-shongsaiñ bad ban tem ïa kino-kino ki huri-hura ha ka sngi ñiew ‘vote’, la mana ban ïaid proseshon bad pyrta slogan hapoh ka jaka ñiew ‘vote’ tad haduh ba da dep ñiew lut ïa ki ‘vote’ bad pynbna ïa ka risol.
Yn nym shah ban pyndonkam ïa ki tynghung sawa bad ban lehkmen da kino-kino ki seng saiñ pyrthei ne ki kyrtong hapoh ka jaka ñiew ‘vote’ bad la mana ban ym shah ban rah dieng, lathi, tiar siat, ïaid proseshon ne ïalum briew hapoh shi kilomitar na ka jaka ñiew ‘vote’.
La mana ruh ban thang bom pataka ha surok ne ha ki jaka paidbah ha ka sngi ñiew ‘vote’. Ym shah ban ïaid paidbah jingjop da kino-kino ki kyrtong ne ki seng saiñ pyrthei hadien ka jingpynbna ïa ka risol hapoh u pud u sam jong ka East Khasi Hills District. Yn ym shah palat ar ngut ki briew ban synran ïa u kyrtong ba jop ne ïa u/ka nongmihkhmat ba la ïoh jingbit ban pdiang ïa ka ‘syrnod ka ilekshon’ na u Returning Officer.
Ha ka jaka jong ka Counting Hall, yn shah tang ïa ki briew kiba don ïa ki ID Card/Car Pass ba la ai da u District Election Officer, East Khasi Hills District, ba kin rung shapoh. Ym shah satia ban rah mobile phone ne camera hapoh ka jaka ñiew vote. Kane ka hukum kan treikam noh mardor tad haduh ka por 4.00 baje janmiet jong ka 6 tarik jylliew.
