New Delhi, Jymmang 23 (UNI)
Ka Department of Telecommunications (DoT) jong ka Sorkar Pdeng ha ka Sngi Palei ka la pyntip ba ka la ithuh ba ki don kumba 6.80 lak ki ‘Mobile Number’ ba la suba ba la ïoh lyngba ki kot ki sla thok lane bym treikam shuh lane ki bym don. Ïa kine ki kot ki sla la pyndonkam na ka bynta ka ‘Proof of Identity’ (PoI) bad ‘Proof of Address’ (PoA).
Na ka liang ka DoT, ha u kyrwoh khubor, ka la ai jingbthah ïa ki ‘Telecom Service Provider’ (TSP) ba kin peit bniah biang ïa ki kot ki sla kiba ïadei bad kitei ki 6.80 lak ki ‘Mobile Number’, bad ki dei ban ai ïa ka kaiphod hapoh 60 sngi.
Ka DoT ka la ong ba da kaba pyndonkam da ka kor ka bor ka juk mynta ba la tip kum ka ‘Artificial Intelligence’ (AI), ka la lap ïa kitei ki 6.80 lak ki ‘Mobile Number’ ha kaba la suba jur ba la ïoh da kaba pyndonkam da ki kot ki sla kiba thok.
“Ka DoT ka la bthah ïa ki kompani (TSP) ba kin peit bniah biang ïa ki kot ki sla jong kitei ki 6.80 lak ki ‘Mobile Number’. Baroh ki kompani (TSP) kin hap ban peit bniah hapoh 60 sngi. Lada ym lah ban peit bniah biang, yn pynkut beit noh syndon ïa ka jingtreikam jong kito ki ‘Mobile Number’,” la ong u kyrwoh khubor.
Shuh shuh ka DoT ka la ong ba ka jingïatreilang ki tnat bapher-bapher bad ka jingpyndonkam ïa ka ‘AI’ ka la ïarap ban wad bad ithuh ïa kitei ki ‘Mobile Number’.
Ka DoT ka la ong ba ka jingpeit bniah biang ïa ki kot ki sla jong kito kiba don ïa kitei ki ‘Mobile Number’ ka long kaba donkam khnang ban ïada ïa ka jingshah tuh pisa lyngba ki kor ki bor.
