Shillong, Jymmang 23
Ka khubor na ki pulit ha ka Sngi Palei ka ïathuh ba uwei u nongshong shnong ïa uba la tip kyrteng kum u Bakyntiewborlang Ksanlah u la ujor ba ha ka 21 tarik Jymmang ha ka por kumba 11:30 mynmiet, ki runar ki bym lah ban ithuh ki la shoh la dat ïa u ha Umkdait, Shillong haduh ba un da mynsaw jur bad la hap donkam ban phah sumar ha Shillong Civil Hospital.
Ha kawei pat ka khubor, ki pulit ki la pyntip ba u D Borah u la ujor ba ha ka 11 tarik Naitung, 2023, u la shim ram na kawei ka ‘Mobile App’ ba la tip kum ka ‘Urban Money’, bad u la siew dep ïa ka ram ha ka 15 tarik Naitung, 2023. Hynrei, u Borah u la ong ba wat hadien ba u la dep pynkhuid ïa ka ram, u la ïoh bun tylli ki ‘phone call’ ha kaba la bthah ïa u ba u dei ban siew shuh ïa ka pisa bad lada um leh kumta, la byrngem ba yn pyndonkam bakla ïa ki kot ki sla jong u Borah kiba u la ai ha ka por ba u la shim ram.
Nalorkata, ki pulit ki la ïathuh ba uwei u nongshong shnong u la ujor ba ha ka 20 tarik Jymmang, ki ‘riew runar ki bym lah ban tip ki la buh ïa kawei ka jingkynnoh kaba pynthohbria ha rynsan ‘Facebook’ (‘Ka Sur Ki Khun Ka Ri’). La ong ba ha kata ka jingthoh, la kynnoh ba ma u bad ki bahaïing hasem jong u ki dei ki ‘menaiksuid’. Ha kajuh ka por, la ong ba kita ki nongkynthoh ki la kren beiñ kren khoh ïa ki bahaïing hasem jong u kiba don jingduna ha ki dkhot met.
Shuh shuh ki pulit ki la ong ba u WB Marbañiang u la ujor ba ha ka 15 tarik Jymmang ha ka por kumba 10 baje mynstep, u nongap khyrdop jong u, u DK Marak, u la lap ba ki runar ki la leit rung ha ka shlem treikam jong ka Agriculture bad ka bym pat shym la pyndonkam ha Upper Nongstoiñ Block-I, bad kita ki runar ki la pynjulor ïa ki sainar ring bording bad katto-katne ki jingkhang ïit jong kane ka shlem.
Ha kawei pat ka jingjia, ki pulit ki la ïathuh ba u Bakiyou Pohthmi u la ujor ba ha ka 19 tarik Jymmang ha ka por kumba 3:20 nohphai sngi, ka kynhun Ericsons ka la lap ba ki runar ki bym lah ban ithuh ki la tuh ïa uwei u Radio Remote Unit (RRU) uba shongdor kumba T. 1.20 lak na ka jaka ba don u Tower ha Konlhi (Khonglah), West Jaiñtia Hills.
