Shillong, Jymmang 24
Ka Voice of the People Party (VPP) ha ka Sngi Thohdieng ka la kren shai ba ka kam pdiang satia ïa ka hukum jong u District Magistrate ka East Khasi Hills ban pyntreikam ïa ka kyndon 144 CrPC ha ka sngi ñiew ‘vote’.
Kum shi bynta ban pynneh ïa ka shongsuk-shongsaiñ bad ban tem ïa kino-kino ki huri-hura kiba lah ban mih ha ka sngi ñiew ‘vote’ jong ka ilekshon MP (ka ban long ha ka 4 tarik Jylliew), u District Magistrate ka East Khasi Hills District ha ka Sngi Palei u la pynjari da ka kyndon 144 CrPC ban khang pyrshah ïa ka jingïaid paidbah ha East Khasi Hills District.
“Ngi la ïoh ban ïakynduh ïa u DC ban pynpaw ïa ka jingsngew na ka liang ka seng. Hooid, u DC u la ong ba un sa khmih bniah haba ïadei bad kane ka hukum kaba la dep ban pynmih mynnin,” la ong u MLA ka Mawlai, Bah Brightstarwell Marbaniang haba kren sha ki lad pathai khubor hadien ka jingïakynduh bad u Deputy Commissioner ka East Khasi Hills, u S.C. Sadhu.
Haba kdew ba ka seng kam don eiei ban ong halor ki bynta kiba u Returning Officer, uba dei ruh u DC, u hap ban pyntreikam ha ka sngi ñiew ‘vote’, ha kawei ka liang u la pynsngew ba ka seng ka kwah ban ban-jur halor ka bynta kaba 5 jong ka hukum kaba ong ba ym shah ïaid paidbah ïa uno-uno u kyrtong uba jop ha ka sngi ñiew ‘vote’ kum ka dak jong ka jingjop.
“Haba ki nongkyrshan da ka jingkmen – ngi ïohi na kawei ka ilekshon sha kawei ka long kumta, hynrei ha kane ka kynti, balei ki kwah ban pyntreikam ïa kane. Ngi la ong ba ngin ym shah. Kam don kum kane sha Ri-lum Garo, kim shym la pyntreikam ïa ka, ki khlem buh ïa kita ki kyndon…peit sha kiwei ki Jylla, peit ka West Bengal, ka jingïaumsnam bad ka jingïap briew ruh ka don bad sha kiwei-kiwei ki distrik…kam don kaba kum kata ka kyndon 144,” ong u MLA.
U la ong, “Hynrei hangne kaba long jai-jai, balei phi kwah pyntreikam, ban khang ïa ki paidbah ban wan ban ïaleh kmen ha kane ka sngi. Na ka liang ka seng ngi la ong ba ngin ym pdiang ïa kane. Ngi la ong ïa u DC ba u dei ban khmih bniah bad u dei ban weng ïa kane.”
U la ban biang ba ka seng da lei-lei kam pdiang satia halor ka jingbym shah ïa ki paidbah ban ïaleh kmen ha ka sngi jingjop wat la lada jop mano-mano ruh naba ki paidbah ki don ïa ka hok ban lehkmen.
Ha kawei ka liang, utei u nongmihkhmat u la ong ba ka seng kam pyrshah ïa ka jingpyntreikam kyndon hapoh ka jaka ñiew ‘vote’ kum ka jingpyndonkam ïa ki ‘PA System’, ban rah lama nalor kiwei-kiwei bad ka seng ka sngewthuh shai ïa kane.
“Hynrei ha ka por ilekshon, la buh ïa ka jaka shabar ba ki nongkyrshan ki lah ban wan bad shong bad ha kato ka jaka kam don kaba kum kata ka jingpyrkhing,” u la ong.
Haba kylli, u Bah Marbaniang u la ong, “Jop ne ngi rem, ngin ym ïakren ïa kata bad ngin ap beit ïa ka 4 tarik, hynrei ka dei ka hok jong baroh, ym tang ïa ki nongkyrshan ka VPP hynrei jong kino-kino kiba jop, ki don ka hok ban lehkmen ha ka sngi jong ka jingjop, wat la kum ka seng ngi don ka jingkyrmen skhem ban poi sha ka thong, hynrei ngin ap beit ïa ka 4 tarik.”
Shuh shuh halor ka jingong u DC ba ka lah ban mih ka jingthut ha ka shong suk shong shngaiñ, na ka liang u Vice-President, Dr. Kara Chen u la bynrap ba kane ka long ka bym don nongrim satia.
“Lada u ong kumta, kumno kiwei pat ki Jylla kum ka Manipur, Bengal – kaba ju don beit ka jingkulmar ha man ka ilekshon hynrei ki khlem pyntreikam kyndon 144,” la buh jingkylli utei u nongïalam.
