Shillong, Jymmang 24
Ka Meghalaya Board of School Education (MBo SE) ha ka Sngi Thohdieng ka la pynbna ïa ka risol jong ka eksamin Secondary School Leaving Certificate (SSLC) bad ka Higher Secondary School Leaving Certificate (HSSLC- Arts).
Haba phai sha ka eksamin SSLC, ka jingdon jong ki khynnah pule kiba ‘pass’ mynta u snem ka long 55.80%.
Baroh ki khynnah pule kiba ïakhun ïa kane eksamin ki don 54,134 ngut ba kynthup ïa 31,358 ngut ki kynthei bad 22,776 ngut ki shynrang.
Na kitei 50,000 tam, ki khynnah pule kiba ‘pass’ ha ka SSLC ki don 30,208 ngut ba kynthup ïa 17,551 ngut ki kynthei bad 12,657 ngut ki shynrang.
Ha kajuh ka por, haba phai sha ki distrik bapher-bapher jong ka Jylla, ka jingdon jong ki khynnah pule kiba ‘pass’ ka long kumne harum :
Distrik Jingdon ki khynnah
ba ‘Pass’
East Garo Hills 39.95
West Garo Hills 42.66
South Garo Hills 35.26
North Garo Hills 23.88
South West Garo Hills 28.41
East Khasi Hills 77.09
West Khasi Hills 65.79
Eastern West Khasi Hills 72.65
South West Khasi Hills 62.54
Ri-Bhoi 59.75
West Jaiñtia Hills 78.34
East Jaiñtia Hills 70.88
Na kane ka jingkheiñ hangne, la paw shai ba ka jingdon jong ki khynnah pule kiba ‘pass’ ha baroh 5 tylli ki distrik ka Ri-Lum Garo kam shym la kot ïa ka 50%.
Haba ïanujor bad u snem ba la dep, ka jingdon jong ki khynnah pule kiba ‘pass’ ha kane ka eksamin ka long 51.93%.
Ka kyrdan banyngkong ha ka eksamin SSLC ka la leit sha u Anuj Chetry na Sherwood School, Tura (575*), bud sa ka Aleytheia Syiemlieh na St. Margaret’s Higher Sec. School, Shillong (574*) ha ka kyrdan ba-ar bad u Congenial Kharsahnoh na Christian Academy, Shillong (571*) ha ka kyrdan ba lai. Nalor kine ki 3 ngut, ki don sa 34 ngut kiwei pat kiba la wan ha ka kyrdan ‘Top-20’.
Ha kawei pat ka liang, haba phai sha ka eksamin HSSLC-Arts kaba la pynbna ha kane hi ka sngi, ka jingdon jong ki khynnah pule kiba ‘pass’ ka long 79.76%.
Baroh kiba la ïakhun ïa katei ka eksamin ki don 27,374 ngut ba kynthup ïa 16,830 ngut ki kynthei bad 10,544 ngut ki shynrang.
Na kitei 27,000 tam, ki khynnah pule kiba ‘pass’ baroh ki don 21,833 ngut ba kynthup ïa 13,887 ngut ki kynthei bad 7946 ngut ki shynrang.
Ka jingdon jong ki khynnah pule kiba ‘pass’ bun eh ha ka HSSLC-Arts ka dei na Eastern West Khasi Hills – 92.32%, katba kiba duna eh ka dei ha South Garo Hills – 56.30%.
Ha ka eksamin HSSLC, ïa ka kyrdan banyngkong la ïasam hapdeng u Menangmankhraw Kharkongor na St. Anthony’s Higher Sec. School, Shillong bad u Gaurav Bharali na St. Edmund’s Higher Sec. School, Shillong kiba la ïoh mar 468*, ka kyrdan ba-ar ka la leit sha ka Tanisha Das na Don Bosco College (Hr. Sec. Section), Tura (451*) katba ka u Saleng Marak na Don Bosco College (Hr. Sec. Section), Tura (450*) u la wan ha ka kyrdan kaba lai.
Nalor kine, ki don sa 12 ngut kiwei pat kiba la wan ha ka kyrdan ‘Top-10’.
Ha u snem ba la dep, ka jingdon jong ki khynnah pule kiba ‘pass’ ha kane ka eksamin ka long 80.30%.
