Shillong, Jymmang 24
Ha ka eksamin Secon-dary School Leaving Certificate lane Matrik mynta u snem, ki la don 7 tylli ki skul ki bym shym la don wat tang iwei ruh khynnah kiba pass, bad san tylli na kine ki skul ki dei kiba don ha Rilum Garo.
Ha ka result ba la pynmih da ka Meghalaya Board of School Education ha ka Sngi Thohdieng, la pyntip ba ki don haduh 679 tylli ki skul kiba la pynïasoh sha ka MBOSE, bad na kine, ki don 7 tylli ki skul ki bym shym la don wat tang uwei ne kawei ka khynnah ban pass.
Kine ki skul ki long ka Bhaitbari Girls’ Secondary School, Bhaitbari ha Rilum Garo kaba la phah saw ngut ki khynnah ban ïakhun ïa ka eksamin Matrik, hynrei ym don ruh iwei ba pass.
Nangta, ka don sa ka Marshillong Presbyterian Secondary School ha Marshillong kaba la phah 11 ngut ki khynnah, hynrei iwei ruh khlem don ba pass.
Shuh shuh na ka Pragatipur Secondary School, Pragatipur, ki la don 18 ngut kiba la ïakhun ïa ka eksamin Matrik, bad ym don ruh iwei ba pass ïa kane ka eksamin.
Nalorkata, ka Resubelpara Govt. Higher Secondary School, Resubelpara ka la phah 19 ngut ki khynnah ban ïakhun ïa ka Matrik, bad hangne ruh, ym shym la don mano-mano kiba pass.
La ïohi ruh ba na ka skul Sabakhthani Secondary School, Musniang Rim, ki san ngut ki khynnah kiba la ïakhun ïa katei ka eksamin ki khlem lah ban poi sha ka thong.
Ka don ruh sa ka Thakimagiri Secondary School ha Phulbari kaba la phah ïa 18 ngut ki khynnah, hynrei ym shym la don iwei ruh ban pass.
Kane ka jia kumjuh ha ka Vidya Mandir Secondary School ha Williamnagar ha kaba ki don lai ngut kiba la ïakhun bad ki khlem poi sha ka thong.
