Shillong, Jymmang 24
Ki pulit ka East Khasi Hills ha ka Sngi Thohdieng ki la pyntip ba la ïoh tam ïa kawei ka shynrong khlieh bad bud sa kiwei pat ki bynta jong ka met na kawei ka nala kaba don ha surok Bivar Road ha ka nongbah.
Ha u kyrwoh khubor, u SP ka East Khasi Hills, u Rituraj Ravi, u la ong ba ha ka 22 tarik Jymmang, la ïoh tam ïa kawei ka shynrong khlieh briew na ka jaka kaba don hajan ka nala ha katei ka surok.
Na ka liang ki pulit ki la pynlong ïa ka jingtohkit ha kane ka jaka na ka bynta ban lap ïa kiwei pat ki dkhot jong ka met. La ong ruh ba ha ka 23 tarik Jymmang, ki pulit ki la lap sa ïa ka bynta jong ka kjat bad kiwei pat. Ïa kine ki bynta la lap da ki pulit kiba wad bniah hapoh ka nala kaba don hajan ka Bivar Road.
Shuh shuh mynta ka sngi pat, na ka liang ka kynhun wad bniah ka la lap sa ïa ka bynta jong ka met ba shalor na kane kajuh ka nala hadien kaba pynlong ïa ka jingwad bniah kaba la neh slem.
Na ka liang ki pulit kin dang bteng ïa ka jingwad ban lap sa ïa kiwei pat ki dkhot met. Ïa ki dkhot met ba la ïoh tam, la phah sha NEIGRIHMS, Mawdiangdiang ban pynlong ïa ka jingpeit bniah.
Katkum ka jingantad na ka liang ki pulit ki la pyntip ba kane ka met ka lah ban dei ka met jong u shynrang hadien ba lap ïa u kynja jingdeng.
Ha kaba ïadei bad kane na ka liang ki pulit ki la pynrung mukotduma hapoh thanat Sadar bad ka jingtohkit ka dang ïaid shakhmat bad ban tip dei mano utei uba la khlad.
