Jowai, Jymmang:
Ka shlem treikam District School Education Officer (DSEO) West Jaiñtia Hills ha ka 23 tarik Jymmang ka la pynlong da ka District Level Science, Mathematics and Environment Exhibition 2024 halor ka phang “Science and Technology for Society”.
Ïa kane ka jingpyninam la pynlong ha Hall ka Jowai Public School, Mooralong ha ka jingdonlang u Deputy Commissioner ka West Jaiñtia Hills District Bah BS Sohliyah, ka District School Education Officer ka Kong AP Syiem nalor ki nonghikai bad ki khynnah skul.
U DC ha ka jingkren u la ong ba ka saïan bad ka jingpyndonkam ïa ka, ka long kaba donkam bha ha kine ki sngi kiba mynta ha kaba ka la wanrah shibun ki jingkylla ki ban kham pynsuk ïa ka jingim jong ki briew.
U la pynshlur ruh ïa ki khynnah ban peit thuh bad wad bniah khnang ba kin long ka jingmyntoi ïa ka imlang sahlang ha ki por ban wan.
Ka Kong AP Syiem, DSEO ka la pynshlur ïa ki khynnah ban shim bad sngewtynnad ïa ka sobjek Science bad Mathematics namar kine sobjek kiba lah ban kyntiew ha ka jingim bad nang pynïar shuh shuh ïa ki jingmut jingpyrkhat jong ki kum ki khynnah skul.
Haba pynpaw ba kiba bun na ki khynnah mynta ki ïaleh ban kiar na kaba shim ïa kine ki sobjek, kumta ka Kong AP Syiem ka la ai mynsiem ïa ki khynnah ba ki dei ban long kiba shlur bad ban shim ïa ka saian kum ka sobjek ka ban kyntiew ïa ki ha baroh ki liang.
Napdeng ki 11 tylli ki skul kiba la wan ban ïashim bynta ha kane ka jingpyninam, ka North Liberty Higher Secondary School ba la mihkhmat da ka Weimaya Nongtdu Lakiang ka la wan ha ka kyrdan kaba nyngkong halor ka sub theme – ‘ Testing the acidity and basicity of the soil using natural indicator (Agriculture), ba ar la ïoh da ka Jowai Public School, Jowai ba la mihkhmat da Alisha Pale halor ka sub theme- ‘ Deminstration and use of traditional method of Medication (Health) bad ba lai da ka Little Angle Higher Secondary School, Jowai ba la mihkhmat da u Janmishaki Nongtdu halor ka sub- theme, ‘ Floating River cleaner LIFE (Lifestyle for environment).
