Nongstoiñ, Jymmang:
Ka National People’s Youth Front (NPYF) Nongstoiñ Block ka ai khublei kyrpang ïa ka sorkar MDA hapoh ka jingïalam jong u Myntri Rangbah ka jylla u Conrad K Sangma bad u Symbud Myntri Rangbah Bah Prestone Tynsong halor ka jingshimkhia jong ki ban pynurlong ïa ka jingkwah jong u paidbah ka bri u hynñiewtrep ban thung DGP da ka Kong Idashisha Nongrang kaba dei ka trai jylla.
U Vice President ka NPYF Nongstoiñ Block u Bah Kynsai Kharbani u la ong, ka jingthung ïa ka Kong Idashisha Nongrang kum ka DGP ba thymmai ka la long ka jingkyrkhu na ka bynta ka jylla bad kane ka dei ruh ka sien ba nyngkong ba ka jylla kan ïoh DGP da ka kynthei kaba dei ruh ka trai muluk trai jylla.
U la ong, “Ngi la ïohi ïa ka jingsdang pruid dak jong ka kum ka DGP na ka bynta ban wanrah ïa ka jingïadei bajan hapdeng ki pulit bad ki paidbah, ban kham pynbha ïa ka rukom ai jingshakri ïa ki longkmie bad kumjuh na ka bynta ka jingangnud ban ïakhun pyrshah ïa u drok uba la sdang ban kynrei haduh katta katta ha kane ka jylla jong ngi.” Kumta, na ka liang ka NPYF ka kitbok kitrwiang ïa ka Kong Idashisha Nongrang ba kan lah ban trei bha ïa ka kam ba la bynshet ha ka, na ka bynta ka jingshngaiñ jong ki paidbah ka jylla.
