Shillong, Jymmang 24
Ka Hynñiewtrep Youths’ Council (HYC) Seng-kmie ha ka 24 tarik u Jymmang ka la leit ban aiti ïa 6 ngut ki khynnah samla Khasi kiba la kyrni ha ka jingdih drok ha kawei ka ‘Rehabilitation Centre’ ne ka jaka ai jingsumar na ka bynta kito ki briew kiba la ngop ha ki jingdih pynbuaid ïa kaba la tip kum ka ‘Alive Again Foundation Rehabilitation Centre’ kaba don ha Assam. Kane ka jaka ai jingsumar ka dei ka jaka kaba la la ban pyllait ïa shibun ngut ki briew na ka jingshah teh mraw ha ki jingdih pynbuaid da kaba wanlam biang ïa ki sha ka imlang-sahlang ba kin im biang ka jingim kaba bha.
Ka jingaiti ka seng ïa kine ki khynnah ka dei na ka jingïakren ïa sngewthuh lang bad ki bahaïing hasem jong kine ki khynnah kiba ka seng ka la ïoh ban bat ha ka jingkhynra ban ïakhun pyrshah ïa ka jingsniew u drok bad ki don ruh ki briew kiba la phone hi sha ka seng ban wan shimti ïa ki bahaïing jong ki kiba la ngop ha u drok hadien ba ki la ïohi ïa ka jingseisoh na ka jingïakhun thma pyrshah ka seng ïa u drok.
Haba ai jingkren sha ki lad pathai khubor, na ka liang u Bah Donboklang Kharlyngdoh, Vice-President ka seng, u la ong ba ka seng ka la phah ïa kine ki samla kiba la ngop ha u drok ka dei lyngba ka jingwan shakhmat ki bahaïing hasem ha ka por ba ka seng ka la ïoh ban kem bad bat ïa kine ki khynnah dih drok.
“Ngim isih ïa u nongdih drok hynrei ngi isih ïa u drok namar na u drok ka ju poi sha ka jingtuh, jinglute bad ka poi ruh shaduh u pud ba pynïap briew tang namar u drok”, la ong u Bah Donboklang.
U Bah Donboklang u la ong ba ka seng HYC naduh ki sngi kiba la dep haduh ka khyllipmat kaba mynta, ki dang pynlong ïa ka jingkhynra ban ïakhun pyrshah ïa u drok ha ki distrik bapher-bapher namar ba kum ka seng ka sngewthuh ba lada shu ïakhun tang shisngi ne arsngi kan nym lah ban long.
“Haba ngi ïakhun ïa u drok ban pynduh jait ïa u drok, phi dei ban tip ba ha lyndet jong kata, ngi ïakhun ruh ban pynim ïa ka mynsiem jong kine kiba la ngop ha u drok”, la bynrap u Bah Donboklang.
Shuh shuh u Bah Donboklang u la pynpaw ka jingsngewtynnad kaba khraw ba kitei ki 6 tylli ki longïing jong kitei ki samla ki la rai ban ïatreilang bad ka seng da kaba wan shakhmat ban wan mih sha ka ophis treikam ka seng ha ka por ba ki khun ki la shah bat ha ka seng bad kiba la pynpaw hakhmat ka seng ba ki kwah ban buh noh ïa ki khun jong ki sha ka jaka ai jingsumar na ka bynta ka bha ka miat ka ïing ka sem bad ka imlang-sahlang baroh kawei.
U Bah Donboklang u la ong ruh ba kiba bun ki briew kiba don ha ka aiñ ki dei ma ki kiba ju pynkheiñ ïa ka aiñ bad u la ong ba ka jingkhynra drok jong ka seng ka la pynmong ïa ki briew kiba don ha ka aiñ hynrei ha ka jingshisha kum ki briew jong ka aiñ ki dei ban ai ka jingïatreilang bad ka seng ban rat dyngkhong ïa une u jingdih u ba sniew.
U Bah Donboklang u la ong ba ka seng kam kwah ban khot bad kynthup lang ïa ki briew ka aiñ ha ka jingleit khynra drok jong ka namar kane ka shu pynwit bad pynktha khlieh pynban ïa ka seng da kaba shah thlia da kumne kumtei.
