Shillong, Jymmang:
U Vijay Kumar Mantri uba dei u Commissioner & Secretary ka Sorkar Jylla uba peit ïa ka tnat Information and Public Relation u la khot jingïalang ïa ki nongshna phlim hapoh ka jylla ha ka Sngi Balang ha shlem treikam DIPR kaba don ha Lachumiere ban ïakren kumno ban shna noh ïa ka Film Policy.
Ha kane ka jingïalang la pynïaid da u Vijay Kumar Mantri ha jingïadonlang u Director ka IPR, ki nongshna phlim Khasi, Jaiñtia bad Garo kiba la ai jingmut shibun na ka bynta ban kyntiew ïa ki kam shna phlim.
Haba ïakren bad u President ka Meghalaya Film Makers Association (MeFliMA) Bah Commander Shangpliang u la ai khublei ïa u Vijay Kumar uba la sngap ïa ka jingkyrpad ka seng ban khot jingïalang ïa ki nongshna phlim hapoh ka jylla.
U la ïathuh ba ha kane ka jingïalang la ïatai sani kumno ban pynkhreh noh ïa ka film Policy ne ka jingpynbeit ryntih ïa ka kam shna phlim hapoh ka jylla khnang ban don la ka jong ka tnad kaba peit kyrpang.
U la ïathuh ba ka kam kaba hakhmat ba ka seng ka buh ha ka sorkar ka dei ban ïarap shna cinema hall man ki district namar lada ym don hall haei yn pyni ïa ki phlim ynda ki la dep shna. U la ong ba kiba bun ki kam ba ki nongpynmih phlim ki la ai jingmut sha ka sorkar jylla hynrei kaba kham bïang tam hap ban phah da ka jingthoh sha ka tnad IPR ba kan pynkhreh noh ïa ka Film Policy.
U Bah Commander u la ong ba ka kam shna phlim ka dei ka lad ban aikam ïa ki samla khamtam ha kane ka pyrthei kyrduh kam namar kan sa poi ka por ba ki samla kin sa ïeng laiñ ban aplai lada lait ka kam ban long kum u tyngshop ne kum ka puron ha ki phlim Khasi lada la lah ban siew ha ka dor kaba biang ha ka jingim jong ki.
