Shillong, Jymmang 24
Wat la u Congenial Kharsahnoh u sah jngai na la ïing bad jngai na ka kmie kaba kha ba pun, hynrei ka la pynkmen pat haba u la wan ha ka kyrdan balai ha ka Top 20 na Christian Academy School, Shillong ha ka jingpynbna ka Meghalaya Board of School Education ïa ka risol Secondary School Leaving Certificate ne Matrik ha ka 24 tarik Jymmang ka Sngi Thohdieng.
U Congenial Kharsahnoh u dei trai shnong na Larnai kaba hap ha Nartiang Block, West Jaiñtia Hills District uba la wan pule sha Christian Academy School Shillong ban sah ryngkat bad ki hynmen.
Na ka liang une u khynnah u la kyntu ïa ki samla pule kiba dang ïakhun ïa ka eksam ha u snem ban wan ba kim dei ban shaniah ha ka bok hynrei ki dei ban hap trei shitom.
Katba ka kmie jong u Congenial, ka Kong Sirancy Kharsahnoh, ka la jaw ki ummat haba ka dang shu mih na shnong ha ka por mynstep bad ynda ka la poi sha Shillong ka la ïoh jingtip ba u khun khatduh jong ka u Congenial Kharsahnoh uba pule ha Christian Academy Shillong u la wan ha ka kyrdan balai ha ka jingpynbna ka MBoSE ïa ka risol ha ka Sngi Thohdieng .
Ka la ïathuh ba naduh dang rit kata naduh klas KG ka la phah skul ïa u Congenial sha Christian Academy Shillong ban sah ryngkat bad ki hynmen namar ïalade ka hikai skul sha shnong.
Nalor nangta, ka Haphilasuk Marbaniang na Christian Academy ka la wan ha ka kyrdan 11.
Katba ka Synod Higher Secondary School ka la ïoh ar ngut kiba wan shakhmat ha ka Top-20 kata ka Neiniwanroi Nongtdeh ha ka kyrdan ba san bad ka Elahunshisha Mawlong ha ka kyrdan ba phra.
Kine baroh ar ngut ki la pynpaw ba kane ka jingjop ka dei ka jingtrei shitom ban ïoh kheit ïa u soh ka jingjop.
