Shillong, Jymmang 24
Hadien shi bnai ba la kut ka jingïalap ilekshon MP Lok Sabha, u MLA ka Nong-krem constituency bad uba dei ruh u President ka Voice of the People Party (VPP) Bah Ardent Miller Basaïawmoit u la mih ryngkat ki sur jingrwai kaba u la rwai ha kawei ka ‘music video’ kaba la ai kyrteng ‘Ksan Thma’ kaba la pyllait paidbah ha YouTube Channel ‘Ki Sur Kynud’.
Ïa kane ka ‘music video’ la rwai da u Bah Ardent Basaïawmoit bad u Bah Shanskhemlang Rynjah ba la thaw da u Bah EW Kharsahnoh.
Haba sngap bha ïa kane ka jingrwai la ïohsngew ba ka sur kynud u Bah Ardent ka long shisha kaba sngewtynnad namar ki kyntien ba u rwai ki long kumne, “namar la ka ri ba ngin ïada, khun samla khasi khun samla khara, ki khla ka wait mynsiem ka shlur, ban ïeng ban ïaleh shaphrang ki tur, ban wanrah burom ïa ka jait ka kur.”
Ha kane ka video la ïohi ba u Bah Ardent u la rwai ha studio ha ryngkat ka pynkhih met bad kohnguh khlieh.
Kum ban shu pynkynmaw, u Bah Ardent u dei uwei u nongïalam uba ki paidbah ki ieid bad sngewtynnad haba u don ïa ka sur kren kaba jam bad kaba pynkhih ïa ka mynsiem jong ki briew haba ki sngap haba u ïeng ha rynsan ban ïalap ïa ka ilekshon.
U Bah Ardent uba la bunkam ban leit ïalap ilekshon man ka sngi ban leit pynsngewthuh sha ki paidbah ban kyrshan ïa u kyrtong ka VPP u Dr, Ricky AJ Syngkon hynrei mynta shwa ban poi ka 4 tarik Jylliew 2024 kaba dei ka sngi ñiew vote ha madan Polo, u Bah Ardent u la ïoh ban rwai hi ha ka ‘music video’ kaba ai kyrteng ‘Ksan Thma’.
