![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Nongpoh, Jymmang 24
Sa kawei ka jingjia kaba la pynher syrngiew ïa ki paidbah, uwei u rangbah na ka shnong Umtasor u la shah pynïap dusmon ha ki runar ki bym lah satia ban tip ha ka miet Sngi Palei hapoh ïing sah jong u kaba don ha katei ka shnong.
Katkum ka tyllong khubor kaba la ïohlum, la ïathuh ba katei ka jingjia ka la jia ha ka por kumba 7 baje hynnin mynmiet ha kaba utei u rangbah uba la tip kyrteng kum u Bah Amison Muruh (35 snem ka rta) u la shah pom da ki tiar kiba nep na ka bynta ba shadien jong u ryndang kat haduh ba un da khlad shi syndon hashen.
U Bah R. Mukhim, Rangbah Shnong jong ka Umtasor u la ïathuh ba ïa ka met jong utei u rangbah la lap nyngkong da ki bahaïing kiba la pyntip pat sha ki nongïalam shnong ban leit mar-mar sha katei ka ïing bad lap ba utei u rangbah uba la thiah lyngktar ha ryngkat ka jinglyngkien ka snam.
Utei u nongïalam shnong lem bad u kñi jong utei u rangbah uba la shah pynïap dusmon, ki pynpaw ka jingsngewsih halor kane ka jingjia kaba la pynher syrngiew bad pynshongsyier ïa ki paidbah nongshong shnong ha kaba ki la kyntu ïa ki bor jong ka aiñ ba kin shimkhia ban thwet bad pynshitom ïa ki runar thrang snam kiba donkti ha ka ban pynïap dusmon ïa une u rangbah.
Halor kane ka jingjia, ki bor pulit ka thanat Nongpoh hadien ka jingïoh jingtip na ki bor shnong halor katei ka jingjia, mar-mar ki la hiar sha katei ka shnong ban pynlong ïa ka jingtohkit bad ruh ban pynkit ïa ka met sha Nongpoh Civil Hospital na bynta ban pyndep ïa ka ‘Post Mortem’.
Shuh shuh, la ïoh jingtip ba ki bor pulit ki la ïoh ban rah noh ïa uwei u briew uba la suba donkti halor kane ka jingjia na ka bynta ban pynlong ïa ka jingtohkit.