Shillong, Naiwieng 17
U kyrtong ka NPP Dr. D.R.L Nonglait u la dep ban leit ïuhkjat ha baroh ki 36 tylli ki konstitwensi jong ka Rilum Khasi-Jaiñtia ha kine ki san bnai jong ka jingleit ban ïalap ilekshon na ka bynta ka ilekshon MP shiteng samoi na Shil-long bad pynpaw ba ka jingkyrshan jong ki paidbah ka long shisha kaba ihun shisha ha manla ki jaka.
Watla na ka liang jong ka ECI kam pat pynbna ïa ka tarik haduh mynta, u Dr. Nonglait haba kren bad ki nongthoh khubor ha ka sngi Ba-ar u la ong ba un nangpynjur ïa ka jingleit ïalap ilekshon.
“Nga la leit ban ïalap ilekshon mynta la palat ïa ka san bnai bad nga lah ban ong ba ka jingkyrshan ka long shisha kaba ai mynsiem bad ngan ïai bteng ïa ka jingleit ïalap ilekshon ka jong nga bad watla haduh mynta ym pat pynbna ïa ka tarik na ka bynta ka ilekshon, kumta ngan dang ïai bteng ïa ka jingleit ïalap na ka bynta ban pan ka jingkyrshan jong u paidbah,” u la ong.
U la ïathuh ba u la dep ban hiar sha jan baroh 36 tylli ki konstitwensi hapoh ka Khasi-Jaiñtia ha kaba u la dep ban pynlong ar ne lai tylli ki jingïalang ha ki katto katne ki shnong bad mynta u dang thmu ban pynlong ïa ka jingïalap ilekshon ha ka wat kaba ar.
“Nga la leit sha jan baroh ki 36 tylli ki konstitwensi, ki don ki konstitwensi kiba nga la dep pynlong jingïalang la 2-3 sien bad mynta ngan sa pynbeit biang ban pynlong ïa ki jingïalang,” u la ong.
U la ong ba ka jingtrei shitom jong u kan pynïakhlad ïa u na ki jingkylla ha ka saiñpyrthei bad na ka jingbym thikna mano pat ban ïakhun ha ka ilekshon MP shiteng samoi.
“Ngam tharai, katba nga nang lah ban ïakynduh ïa ki paidbah, katta nga nang ïoh jingkyrshan,” u la ong, haba la kylli hato ka jingkylla ka saiñpyrthei ka lah ban long ka mawjynthut ban poi sha ka jingjop.
“Ngam donkam ban pyrkhat la ka BJP ne kano-kano ka seng saiñpyrthei kan pynïeng kyrtong ne em hynrei na ka liang jong nga ngan ïai bteng ban ïalap ilekshon,” u la bynrap. “Kumba nga la dep ong, ka jingkyrshan paidbah ka long kaba bha”.
U Dr.Nonglait u la kam ba ka jingïoh 8 ngut MLA ka BJP kan nym pynduh jingkyrmen ïa u ha kane ka ilekshon MP shiteng samoi.
“Ngam don jingtip eiei la ka BJP kan pynïeng kyrtong ne em hynrei watla nga hap ban ïakynduh ïa ki katto katne ki nongïaleh pyrshah, ngam don kano-kano ka jingartatien ban jop ha kane ka ilekshon,” u la ong.
U Dr.Nonglait u la kynthoh ïa ka jingïatylli halor ka jingdawa ïa ka ktien Khasi, da kaba ong ba ka jingkyrshan jong ka BJP ban pynrung ha ka khyrnit kaba phra ka dei ban pynkhlain, ym ban pynïakhlad ïa ka daw.
“Namar ba ngi ïaleh na ka bynta kajuh ka mat, nga tharai ba ka long kaba bha, nga mut ban ong baroh lang, ngin ïaleh na ka bynta kajuh ka mat,” u la ong. “Kam pher la ka BJP ne kano-kano ka seng ka shim ïa ka burom na ka bynta katei ka mat hynrei kaba donkam ka long ba ka jingdawa ka dei ban urlong”.
U la kyntait ïa ka jingkynthoh u President ka MPCC ban thep vote pyrshah ïa ki kyrtong ka NPP bad ka BJP namar ki ju thep vote ban kyrshan ïa kano-kano ka Bill kynthup ïa ka CAB, kaba ïaid pyrshah ïa ka jingsngew jong ki paidbah ka Jylla.
“Ka CAB ka dei kawei pat ka mat bad ka jingpynrung ïa ka ktien Khasi ha ka khyrnit kaba phra ka dei kawei pat ka mat, baroh ki party ha Meghalaya ki kyrshan ban pynrung ïa ka ktien Khasi ha ka khyrnit kaba phra,” u la ong. “Kumta, ngi kyrmen ba kan ym don kano-kano ka jingïatyngkhuh hapdeng ki seng saiñpyrthei, kawei pa kawei na ki seng saiñpyrthei na Meghalaya kan kyrshan ban pynrung ïa ka ktien Khasi ha ka Khyrnit kaba phra.”
Halor ka CAB, u Dr. Nonglait u la kyntait ban kren eiei, da kaba kdew ba katei ka bill ka la sdang hashuwa ba un rung sha ka NPP. “Ka jingsngewkhia jong nga ka long ba ka ktien Khasi bad Garo kin ïoh jaka ha ka khyrnit kaba phra,” u la ong.
Haba kylli kyrpang shaphang ki konstitwensi jong ka liang pyrshah, u Dr.Nonglait u la ong ba ka jingkyrshan kaba u ïoh ka la long kumjuh ha man la ki jaka.
“Ka jingkyrshan paidbah ha baroh ki konstitwensi ka long kaba bha. Ngam ïohi ba ka jingkyrshan kan hiar namar kumba nga ju ong, nga ïajan bad ki paidbah, bad kumta ka jingkyrshan jong ki ruh ka long kaba bha,” u la ong.
