Shillong, Naiwieng 17
Ka Khasi Hills Bazar Bus Association (KHBBA), ka la rai ban pyneh beit triang ban nym mih na Mawlonghat parking lot, ka jaka ba ki ju ïeng barabor.
Ka KHBBA ka la rai ruh ban pynlong da ka jingïaid ‘rally’ ba jai-jai sha khyrdop Secretariat lashai ka 18 tarik Naiwieng 2026.
Kane ka rai jong ka seng ka mih hadien ba ka jingïakren bad u Director ka Urban Affairs, u P.K Boro kam long kaba seisoh katkum ka jingkwah jong ka seng.
U Bah Kyrshan Rynjah General Secre-tary ka KHBBA u la pynsngew “Ka jingïakren bad u Director kam poi shano-shano, ki buh pynban ïa ka jingkylli ïa ngi lano ngin mih noh na kane ka jaka, kaba ngi ju ïeng bos bad ka rai ka jong ngi ka long ba ngin ym mih na kane ka jaka”.
Ki nongïalam hadien ba ki la dep ban ïakynduh bad u P.K Boro ki la leit beit-beit sha ka jaka ba ju ïeng ki bos ha Mawlonghat, ban pan ka jingmynjur lang, ba hato kin pyndem ne kin pyneh.
La sakhi ba ha ka jingpan jingmynjur, ki nongñiah bos baroh ki la ong ba kin pyneh beit ban kynriah na katei ka jaka, kumba la thmu pynkynriah ka Sorkar.
U General Secretary u la ong ba kin ïai ïaleh ban nym shah ban pynkynriah na katei ka jaka ba ju ïeng barabor, tad haduh ba ka Sorkar kan shim da kiwei pat ki sienjam.
Lah ban kdew ba ka jingïakhih ki nongñiah bos da kaba sah miet ha katei ka jaka ïeng, ka la poi sha ka shitaïew tam, katba na ka liang jong ka Sorkar kam pat ai kano-kano ka jubab sha ki.
Kumta u la buh ka jingkyrpad ïa baroh ki paidbah kiba ju pyndonkam da ki bos, ba kin sngewbha ban wan pynshngaiñ lang ha katei ka jingïaid paidbah, kaba sdang na Ïewmawlong sha Motphran, Secretariat bad wan phai biang sha jaka ïeng ha Mawlonghat.
