Shillong, Naiwieng 17
U Myntri Rangbah ka Jylla Conrad K Sangma, ha ka sngi Ba-ar u la pyllait paidbah ïa ka MeghGo, ka mobile application kaba nyngkong eh ha Meghalaya, kaba wanrah lang ïa ki jingshakri jong ki kali kamai bapher-bapher hapoh kawei ka rynsan digital ha Shillong.
Kane ka application kaba long trai da ka Sorkar ka thmu ban pynsuk ïa ka leit ka wan jong ki paidbah ha kylleng ka Meghalaya lyngba ka jingpynsuk ban ïoh ïa ki jingshakri ki kali kamai, kaba pynlong ïa ka leit ka wan kaba suk, kaba biang bad kaba shngaiñ na ka bynta ki nongshong shnong bad ki nongwan jngohkai ruh.
Haba pynbna ïa ka jingpynlait paidbah, u Conrad u la ong, ka MeghGo kam dei tang ka application ban book ïa ki taksi (taxi booking app), hynrei ka thmu ruh ban plie ïa ki lad kamai ba thymmai na ka bynta ki nongñiah taksi bad ban pynkhlaiñ ïa ka kam kamai kali ha ka Jylla hi baroh kawei.
U Myntri Rangbah u la ong ba kane ka application ka long kawei na ki sienjam ban pynsuk ïa ka leit ka wan ha Meghalaya.
Hadien ka jingïalang pyllait paidbah, haba pyni ïa ka rukom treikam jong kane ka application, u Conrad u la ïathuh ba ma u hi u la dep ban book kali na ka MeghGo bad leit da ka taxi MeghGo ryngkat bad u Bah Nang.
U la kyntu ruh ïa ki nongshong shnong bad ki nongwan jngohkai ban pyndonkam ïa kane ka application khnang ban pynsuk ïa ka leit ka wan jong ki paidbah ha kylleng ka Jylla.
Da kane ka jingpynlait paidbah ïa ka MeghGo, ka Meghalaya ka la shim ïa ka sienjam ban wanrah ïa ki jingkamai ki kali bapher-bapher hapoh kawei ka rynsan digital, ha kajuh ka por ban thaw ïa ka rynsan kaba la kyrshan da ka Sorkar na ka bynta ki nongleit nongwan bad ki nongñiah kali kamai.
Kane ka app ka treikam ha ka rukom ba khlem jingsiew (Zero-commission model), ha kaba ki nongñiah kali ki siew T.15 man ka sngi na ka bynta ki arshaka, T.20 na ka bynta ki auto bad T.35 na ka bynta ki cab. Ïa ka jingsiew yn pynïaid da ka society jong ka Sorkar ban ai ïa ka insurance bad ka khusnam na ka bynta ka jingtrei.
Ki lad jingïada ki kynthup ïa ka jingïasam ïa ki jingtip ba bniah jong ka jingleit bad ki briew kiba lah ban shaniah, ki jingpynbna ba kyrkieh bad ka jingkyrshan ïa ki nongleit nongwan. Kane ka app ka kyrshan ïa ka English, Khasi, Garo bad Hindi.
Haba peit sha khmat, u Conrad u la ong ba ki jingthmu ki dang ïaid shakhmat ban pynïasoh ïa kane ka app bad ki 3,000 tylli ki homestay ba la bei tyngka da ka Sorkar ban thaw ïa ka lad ban buh kawei ka jaka booking na ka bynta ki nongjngohkai pyrthei.
