Shillong, Jymmang 24
Ki pulit ka jylla ha ka Sngi Thohdieng ki la pyntip ba kawei ka kynthei ba shong ba sah ha kawei na ki jaka ha East Khasi Hills ka la ujor ba ha ka 10 tarik Jymmang ha ka por mynsngi, ka la ïakynduh ïa uwei u briew uba la ai kyrteng kum u Wing Wing Lyngdoh ha ka jaka bam kaba don ha Civil Hospital, Shillong.
Ha ka jingujor, katei ka nongmudui ka la ong ba ka jingïakynduh ïa u Wing Wing Lyngdoh ka long ban thied ïa ka ar shaka ka jong u (ML-05AA-6221) ha ka dor T. 62,000. Hynrei la ong ba hadien ba u Wing Wing Lyngdoh u la ïoh ïa kane ka pisa na ka, u la mih noh na katei ka jaka bam bad u la phet krad syndon da ka ar shaka ka jong u.
Ha kawei pat ka jingjia, ki pulit ki la ïathuh ba ka Kong Roalin Khongkhriam ka la ujor ba ha ka 21 tarik Jymmang, ki runar ki la leit prong ha ka ïing sah jong ka ha Laitkor Mawrie Lumheh, Shillong, bad ki la tuh ïa ka pisa kaba don T. 20,000, bad ka ksiar ka ksah kaba shongdor kumba T. 60,000.
