Shillong, Jymmang 24
Ka Khasi Hills Autonomous District Council (KHADC) bad ka Hima Mylliem ka la mana shisyndon ïa kiba don dukan ha Ïewduh ba kin sah ha dukan bad la rai ban nang pynkhlaiñ ïa ka jingpahara da kaba buh pulit pahara shuh ha ïew da ki pulit ka Hima Mylliem bad pulit Enforcement jong ka Council.
Ïa kane ka rai la shim ha ka jingïalang kaba la lum da u Chief Executive Member (CEM), Bah Pynïaid Sing Syiem, ka Executive Member kaba peit ïa ka ïew, Kong Grace Kharpuri lem bad u Syiem ka Hima Mylliem, Pa’iem Ainam Manik Syiem nalor ki nongkitkam ka Hynñiewtrep Ïewduh Association kaba la long ha kamra treikam u CEM ha ka Sngi Thohdieng.
Haba kren sha ki lad pathai khubor hadien ka jingïalang, u CEM u la ong ba ka jinglum ïa ka jingïalang ka dei halor ka mat kaba kongsan na ka bynta ka jingshngaiñ bad ban khanglad ïa ki kam sniew hapoh ïew.
U Bah Pynïaid u la ong hadien ka jingïatai, la shim ïa ka rai ba ka KHADC kan pynmih da ka hukum ban phah sha ka Hima Mylliem ban nym shah shuh ïano-ïano kiba don dukan ha Ïewduh ba kin sah ha dukan ban ap miet namar baroh shikatta ki dang don katto-katne ki dukan kum ki dukan sha bad ja bad dukan jaiñ kiba la kyrpad ban shah ban ap miet hynrei mynta la rai ban nym shah shuh ïano-ïano ban sah ha ïew.
U Bah Pynïaid u la mana ruh ïa ki briew kiba pyrshang ban sah wan beaiñ ha Ïewduh khamtam hadien ba kiba sah Lum Survey ki la shah pynpra ïa ki ïing trep kiba ki la shna hangtei.
U CEM u la ïathuh ba kum ka jingshngaiñ ha ka por mynmiet ha Ïewduh, la rai ban pynbun shuh-shuh ïa ki pulit pahara da kaba phah sa 10 ngut ki pulit Enforcement na ka liang ka KHADC.
U CEM u la pynbna ruh ïa ka rai ba ha Ïewduh baroh kawei dei ban khang noh ha ka por 10 baje mynmiet. Kane ka dei namar ban khanglad ïa ki kam sniew naduh ka tuh ka thiem, ka jingjyllei u drok bad kiwei ki kam sniew kiba la lah ban jia ha Ïewduh.
