Jowai, Jymmang 26
U Dolloi ka Elaka Jowai, Bah Puramon Kynjing u angnud ban pynkhie im ïa ka Pastieh Ryngkaw hapoh ka Raij Jwai.
Ïa kane u la pynpaw ha ka Dorbar Niam ka Seiñraij Jowai kaba la long ha ka Sngi U Blei ha madan kñia pyrthat kaba don ha Dulong Pohhali. Ïa ka shad Pastieh la ju pynlong lai sien ha ka pateng Dolloi ban ainguh aidem ïa u Blai Ryngkaw.
“Nga kum u Dolloi nga don ka jingsngewrem lada ym ïoh ban pynlong ïa kane ka shad Pastieh”, la ong u Dolloi.
Ïa kane ka jingthrang jong u Dolloi ka Dorbar Niam jong ka Raij Jowai ruh ka la mynjur bad ïa ka jaka la pynkhreh ban sdang na Loom Mookhai bad pynkut ha madan Blai Ryngkaw kaba don ha Tpep Pale.
