![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 26
Ha ka sien banyngkong, ka NIT Meghalaya ha kane ka taïew ba la dep ka la plie ïa ka ‘Computer Training Center’ ha ka jaka ba shi por jong ka ha Bijni Complex, Laitumkhrah, Shillong, na bynta kiba duna ha ka bor ïohi kumjuh ban kyntiew ïa ka lad kamai jong kiba kum kine ki briew.
Ha kylleng sawdong ka Jylla, ki don kumba 2,300 ngut kiba briew kiba duna ha ka bor ïohi.
Ïa kane ka jaka la plie da ka Maya Alag bad u Sunil Alagh, Chairman, BoG, NIT Meghalaya.
Ha kane ka jingïalang, la ïadonlang ruh u Director ka NIT Meghalaya, Prof. Pinakeswar Mahanta, Dean, Professor, nonghikai, ki nongtrei lem bad ki dkhot ka Blind Lead Trust hapoh ka jingïalam u Bah Jitendra Dkhar, (Co-Founder Managing Director), Kong Bandwina Khymdeit (Secretary), Kanai Debnath (Trustee) bad Bah Kamdathmu Langstang (Trustee).
Ïa kane ka jaka la pynïeng da ka kynhun hapoh ka jingïalam u Dr. Bunil Kumar Balabantaray, Assistant Professor, Department of Computer Science & Engineering.
Ha kane ka jaka ai jinghikai, ki briew ba duna ha ka bor ïohi kin ïoh jinghikai ha ka liang ka ‘Microsoft Office’, ‘Excel’, ‘Document Writing’, ‘Web Browsing’, ‘Social Media’ nalor kiwei-kiwei.
Ka jingai jinghikai kan long na bynta 2 bnai. Ha ka kylla banyngkong yn pdiang ïa 10 ngut ki briew bad ïa ka syrnot yn ai da ka NIT Meghalaya.
Shuh shuh la pyrkhat ba kum shi bynta ban kyntiew ïa ka lad kamai jong ki briew ba duna dkhot met, ka NIT Meghalaya kan sa pynïeng ïa ka ‘Skill Development Center’ ba kyrpang ha Main Campus kaba ha Sohra.