Jowai, Naitung 20
Ka Raid Buam ha ka sngi Nyngkong ka la pynlong ïa ka jingpyn-kup burom ïa u Symbud Myntri Rangbah ka Jylla, u Bah Sniawbhalang Dhar, ha ka shnong Umladkhur, West Jaiñtia Hills. Kane ka jingpynkup burom ka long kum ka dak ka jing-sngewnguh jong ka Raid Buam halor ka jingnoh synniang jong u ban pynbeit ïa ki kynrum kynram kiba la slem halor ka Kshaid Krangshuri bad kumjuh ruh halor ka jingkyrshan jong u ban kyntiew ïa ka kam jngoh -kai pyrthei hapoh ka Raid.
Ha kane ka prokram la wan ban shim bynta da ki rangbah jong ka Raid Buam kynthup ïa u Sumiar Buam Lyngdoh, u Ma Donbok Buam, Secretary ka Raid Buam, u Ma Soomeyoo SNS Sayoo, Adviser ka Raid Buam, nalor u Deputy Commissioner, Superintendent of Police, ki ophisar Sorkar, u Doloi Jowai, u Doloi Amwi bad kiwei pat ki riew rangbah. Ki paidbah na Umladkhur bad Thangbuli ruh ki la wan ban sakhi ïa kane ka sngi kyrpang.
Ha kane ka sngi, ka Sorkar Meghalaya ka la aiti biang ïa ka Kshaid Krangshuri sha ka Raid Buam hadien ba la lah ban pynbeit ïa ki jingïakajia kiba la mih hapdeng ki kur. Ha kajuh ka por, u Bah Sniawbhalang Dhar u la buh ruh ïa u maw nongrim jong ka Regeneration Meghalaya Project, kaban pyntreikam da ka Earthtree Enviro Pvt. Ltd., bad u la plie ruh ïa u maw nongrim jong ka Sniawbhalang Dhar Waterfall, kaba ka Raid Buam ka la ai kyrteng ha ka kyrteng jong u kum ka dak ka jingsngewnguh ïa u.
Haba kren sha ki lad pathai khubor, u Bah Sniawbhalang Dhar u la ong ba ka kam jngohkai pyrthei ka long kawei na ki bynta ba kongsan tam ha kaba pynmih lad kamai bad pynïohkam ïa ki samla. U la ong ba ka jingdon ki jaka jngohkai pyrthei ka ai kabu ïa ki trai shnong ban seng ïa ki homestay, ki dukan bam, ki hotel bad kiwei pat ki kam kiba wanrah ïa ka ïoh ka kot bad kyntiew ïa ka roi ka par jong ki shnong.
U la bynrap ruh ba ka Sorkar Jylla ka dang peit bniah bad pynkhreh ban kyntiew shuh shuh ïa bun tylli ki jaka jngohkai pyrthei kiba don ha Rilum Jaiñtia bad ha kiwei de ki bynta jong ka jylla Meghalaya.
Ha kane ka prokram la ïoh ruh ïa ki jingkren na u Bah Ronal Wahlang, District Tourism Officer, West Jaiñtia Hills, ka Vevotolu Kezo, SDO (Civil), Amlarem Sub-Division, Bah Sunny Donkupar Mawiong, Director jong ka Earthtree Enviro Pvt. Ltd., u Jagpal Singh Dhanoa, Superintendent of Police, West Jaiñtia Hills, u A.K. Singh, Deputy Commissioner, West Jaiñtia Hills, u Rishabh Khanna, CEO Earthbanc, Dr. S. Goswami, COO Earthtree bad kiwei de ki ophisar bad ki riew rangbah kiba la ai jingkren halor ka jingdonkam ban kyntiew ïa ka kam jngohkai pyrthei bad ban pynneh pynsah ïa ka mariang ha ka thaiñ.
