Shillong, Naitung 20
Ha ka sngi Nyngkong jong ka taïew, ki samla pule na Nongbah Shillong, ha ryngkat ki longkmie longkpa ki la mih ryntih ban pynlong da ka jingïakhih ha Don Bosco Square Laitumkhrah halor ka jingdawa ban shim jingkitkhlieh ba lait tuh ki jingkylli ka NEET.
Ha kane ka sngi, la sakhi ba naduh ki samla pule bad ki longkmie longkpa, da ki spah ngut ki la poi bad rah ruh ïa ki plakad jong ki, ban dawa shim jingkitkhlieh halor ka jinglait tuh ki jingkylli bad ban wanrah ïa ka jingkylla ha ka pule puthi.
Ka jingïakhih ka long ruh kum shi bynta ban ïakhih da kaba jar-jar, ban pyrshah ïa ka jingsngap mynthi ka Sorkar Pdeng, ba lait tuh ki kot jingkylli exam NEET bad ruh ban ai ka jingkyrshan ïa ka Cockroach Janta Party (CJP).
Ki Samla pule ki la dawa hiar shuki ïa u Myntri ka tnad pule puthi ka Sorkar Pdeng, u Dharmendra Pradhan bad kumjuh ruh kum shi bynta ban ai ka jingkyrshan ïa u nongïakhih, u Sonam Wangchuk uba la shong shah thngan khlem buh por ha Jantar Mantar Delhi, kaba la dap la 20 sngi lynter.
Haba ïoh ban ïakren bad ki samla ba wan ïakhih ki la ong, ba kane ka jingïakhih ka long kum shibynta ban ïa ïeng tylli, ban ïakhih ruh na ka bynta ka pule puthi ha ka ri bad ruh na ka bynta ka Jylla.
Haba kylli, ki la jubab ba ka Sorkar ha ka jaka ban ai ka jingkyrshan ban sngap ïa ki jingdawa, pynban ka shim da kiwei ki sienjam, kaba la pyni bor pynban ïa ki nongïakhih ha Nongbah Delhi.
Kum ban shu kdew ba da ki hajar ngut ki la ïalum ha Jantan Mantar, Delhi ha ka jingïakhih ka CJP, kaba la kyrshan da ki Samla pule bad u Sonam Wangchuk, u nongtrei mon sngewbha kiba pyrshah ïa ka jinglait tuh ki jingkylli ka exam NEET bad kiwei-kiwei de ki mat.
