Nongpoh, Naitung 20
Ha kawei ka jingjia ha ka step sngi Nyngkong, uwei u heprit u la duh noh ïa la ka jong ka jingim, katba saw ngut kiwei pat kila ngat ha ka jingmynsaw hadien ba ka ïing kaba ki shong ki sah, kala shah ban ha ka khyndew ha ka shnong Umlamphlang, kaba hap ha Mawhati konstitwensi.
Katkum ka khubor ba la ïoh lum, la ïathuh ba ka daw jong ka jingtwa jong ka khyndew, ka dei namar ka jingjur jong u slap uba la neh bun kynta ha kane ka step hajan baroh ki thaiñ jong ka Ri Bhoi District.
Kane ka jingjia twa khyndew ka la jia ha ka por kumba 4 baje mynstep ha ka por ba ki dkhot jong katei ka ïing ki dang ïoh thiah lyngngai. Kane ka apot ka la wan jia ha ka ïing jong u Bah Stolin Khymdeit bad uba la khlad ha kane ka jingjia, u dei u khynnah ba dang 7 snem ka rta, ba la tip kyrteng kum u Pynhun Umbah bad ki lai ngut ki khun u Bah Stolin kiba la mynsaw ki dei kiba la tip kyrteng kum u Pynskhem Umbah, 16 snem ka rta, ka Ibani Umbah, 13 snem ka rta bad ka Saphira Umbah, 8 snem ka rta ki la mynsaw bad ïa kine kiba la mynsaw la pynkit noh sha ka jaka ai jingsumar.
Katei ka jingjur u slap kala wanrah ruh ïa ka jingshlei um ha kiba bun ki bynta jong ka surokbah National Highway 6 ha ki thaiñ Nongpoh, Byrnihat bad ruh ha ka shnong Umladoh jong ka surok 20 Mer-Patharkhmah.
Ha kaba ïadei bad katei ka jingjia twa khyndew ha Umlamphlang, u Bah Charles Marngar, MLA ka Mawhati u la pynpaw ïa ka jingsngewsih jur halor katei ka jingjia kaba la shim noh ïa ka jingim jong uwei u heprit bad phah ruh ïa ka khubor sngewlem sha ki bahaïing hasem jong kitei lanot.
