Shillong, Naitung 20
Ka tnad Revenue, hapoh ka tnad Kam Pla Tyngka jong ka Sorkar India ka la pynlong ïa ka jingïalang kaba 14 jong ka BIMSTEC Sub-Group halor ka jingpynïaid be-aiñ ïa ka pisa bad ka jingïaleh pyrshah ïa ka jingbei tyngka ïa ki kam lehnoh ha Shillong, India ha ka 20 tarik u Naitung 2026.
Ka jingïalang ka la wanrah lang ïa ki kynhun na baroh hynñiew tylli ki Ri ba long dkhot jong ka BIMSTEC, da kaba pynskhem biang ïa ka jingkular lang jong ki ban pynkhlaiñ ïa ka jingïatreilang ha ka thaiñ ha kaba ïaleh pyrshah ïa ka jingpynïaid be-aiñ ïa ka pisa, ka jingbei tyngka ïa ki lehnoh, ka jingbei tyngka ïa ka jingpynroi ïa ki tiar, bad kiwei-kiwei ki jait kam runar kiba nang kiew.
Ka jingïalang ka la peit bniah ïa ka jingjam shaphrang naduh ka jingïalang kaba 13 jong ka Sub-Group bad ka la ïasam jingmut halor ki jingjop jong ka AML/ CFT ha ka ri, ki jingma kiba dang mih, ki kam kiba nang kiew bad ki rukom treikam kiba bha. Da kaba ithuh ïa ka jinglong ba nang kiew jong ki kam runar ha ka liang ka pisa tyngka ba la plie lad da ka teknoloji, ki Ri ba long dkhot ki la pynpaw ïa ka jingdonkam ban pynkhlaiñ ïa ka jingïatreilang ha ki thaiñ, ka jingsam jingtip ha ka por kaba biang, ka jingkyntiew ïa ka bor treikam bad ka jingpyndonkam hok ïa ka teknoloji ban kyntiew ïa ki rukom treikam jong ka AML/CFT ha ki ri bad ha ka thaiñ.
Kum ka sienjam kaba kongsan, ka jingïalang ka la pyndep ïa ka Paper on Illicit Flow of Funds (IFF) bad ka rukom treikam ban ïada na ka jingtuid pisa be-aiñ ha ka thaiñ BIMSTEC, kumjuh ruh ïa ka jingïateh kular halor ka jingkyntiew ïa ka bor treikam ban ïakhun pyrshah ïa ka jingpyndonkam be-aiñ ïa ka pisa bad ka jingbei tyngka ïa ki kam lehnoh, ban pynkhlaiñ shuh-shuh ïa ka jinglah ban ïatreilang ha ka thaiñ.
Ka jingïalang ka la mynjur ruh ban wanrah ïa ka BIMSTEC AML/CFT Work Plan (2026-2028) bad ban jur halor ka jingpyntreikam ïa ka BIMSTEC AML/CFT Contact Point Network ban pynskhem ïa ka jingïatreilang hapdeng ki Financial Intelligence Unit.
Ka jingïalang ka la ïakren ruh shaphang ki lad ki lynti ban pyndonkam hok ïa ka kyrdan Observer jong ka BIMSTEC ha ka kynhun Asia/Pacific Group of Money Laundering (APG) ban kyntiew ïa ka bor treikam ha ka thaiñ, ban pynsuk ïa ka jingsam jingtip, bad ban pynkhlaiñ ïa ka jingpynkhreh jong ki Ri ba long dkhot na ka bynta ki FATF ki ban sa wan. Ki Ri kiba long dkhot ki la pynlong ruh ïa ki jingïakren kiba bniah halor ki jingma kiba dang mih kiba ïadei bad ki jingdon jingem digital, ki rynsan fintech, ka artificial intelligence, ka jingpyndonkam beaiñ ïa ka pisa kaba pynshong nongrim ha ka khaïi pateng, ka jingleh thok online bad kiwei-kiwei ki kam runar ha ka liang ka pisa tyngka ba la plie lad da ki kam digital.
Ka jingïalang ka la pynpaw ïa ka jingdonkam ban don ïa ki rukom pynïaid kam kiba kham khlaiñ, ban pynkhlaiñ ïa ka jingïatreilang hapdeng ki riew shimet bad ka Sorkar, ban kyntiew ïa ki lad ban peit bniah bad ka jingïatreilang kaba khlaiñ ha ka thaiñ bad ka pyrthei ban weng ïa kine ki jingeh kiba nang kiew.
Ka jingïalang ka la pdiang ïa ka kaiphod jong ka bad ka la ïanujor ïa kane bad ka jingïalang kaba 13 jong ka BIMSTEC Joint Working Group on Counter Terrorism and Transnational Crime (JWG-CTTC) ban ïoh jingmut. Ki kynhun ki la pynpaw ïa ka jingsngewnguh ïa ka tnad Revenue, hapoh ka tnad Kam Pla Tyngka jong ka Sorkar India kaba la peit bniah ïa ki jingpynkhreh ïa kane ka jingïalang bad ka jingpdiang burom ïa baroh ki nongïashim bynta. Ka jingïalang ka la pynpaw ruh ïa ka jingsngewnguh ïa ka BIMSTEC Secretariat kaba bteng ban ai ïa ka jingïatreilang bad ka jingkyrshan.
