Shillong, Naitung 20
Ka Sorkar Meghalaya ha ka Lah Sngi U Blei ka la sdang ïa ka ‘Pilot Project’ ban pynduh jait ïa ka jingpang ‘Rabies’ na ka jingdait ksew ha Laitumkhrah lyngba ka sienjam treikam “One Health”, kaba wanrah lang ïa ki nongshim bynta na ka liang ka koit ka khiah, ka tnad ri jingri bad ka imlang-sahlang.
Kane ka prokram ba la ïalam da ka National Health Mission (NHM) ha ryngkat ka jingkyrshan ka tnad ka koit ka khiah, Animal Husban-dry & Veterinary, bad ka CRE India Foundation kan sdang ha ka 22 tarik Naitung ha kylleng ki dong jong ka Laitum-khrah.
Ki heh ophisar ki la ong ba kane ka saiñdur ka pynleit jingmut halor ka jingai injek ïa ki ksew, ka jingpynsngewthuh paidbah, ka jingpynbha ha ka jingpeitngor ïa ki jingpang, bad ka jinglong trai ïa ki mrad ba don ka jingkitkhlieh ban pynurlong ïa ka thong jong ka pyrthei, kata ban ym don kano-kano ka jingïap briew na ka jingpang ‘Rabies’ hapoh u snem 2030.
Ka phang pdeng jong ka Jylla na ka bynta kane ka jingïalap ka long “One Health, One Future – Together for a Rabies-Free Meghalaya.”
U Dr. Paul N. Chyne, Director (MCH & FW) bad Joint MD, NHM, u la ong ba kane ka ‘Pilot Project’ kan khmih bniah ïa ki buit kum ki jingpyndait ryndang ba don ïa u ‘QR-Code’ bad ka jingbuddien lyngba ki lad ‘digital’ hashuwa ban ïaid ha ka Jylla baroh kawei.
Na ka liang u Dr. David T. Sun na ka tnad Animal Husbandry u la ban jur halor ka jingai injek bad ka jingpynduh khun, katba u Director ka CRE India, u Harish Tiwari u la buh ïa ka thong ban kynjoh 70% ka jingai injek ïa ki ksew bad pynbna ruh ïa ka jingnoh synñiang kaba T.1 lak.
U la ong ruh ba ka rukom peit bniah lyngba ka ‘App’ kan ïarap ban buddien ïa ki ksew ba la ai tika.
U Rangbah Shnong ka Laitumkhrah, u Bah Andrew Dkhar, u la kular ban ai ka jingkyrshan, da kaba kdew ba ka jingbun ki samla pule bad ki nongpang ha ka thaiñ, ka la shah ktah shi kat dei ha ki ksew surok.
Kumjuh, ka Kong Valerie J. Laloo, State Nodal Officer ka NHM ka la ong ba kane ka ‘Pilot Project’ kan ai jinghikai na ka bynta ban pyntreikam ïa kane ha baroh kawei ka Jylla.
Ha kane ka sngi la don lang ki ophisar na ka tnad ka koit ka khiah bad ka tnad ri jingri.
