Shillong, Naitung 20
Ka ïingbishar Meghalaya High Court kala bthah ïa ka Sorkar Jylla ba kan aiti ïa ka affidavit ba batai shai ïa ka lynti ban pynheh ïa ka surok liengsuiñ ha Shillong Airport, wat haba ka DGCA kala ong ba ka kloi ban ai ïa ka jingbit ban pyntrei noh ïa ka kam shisien ba ki jingai jingmynjur jong ka Sorkar kila biang lut.
Ka Division Bench ka Chief Justice Revati Mohite Dere bad Justice W Diengdoh kala pynmih ïa kane ka jingbthah haba bishar ïa ka PIL ha ka sngi Nyngkong.
U Joint Director ka DGCA, B Bhushan uba mihkhmat lyngba ka video conference, u la pyntip ïa ka ïingbishar ba ka DGCA kan pynïaid shakhmat ïa ka kam da ka jingai jingbit ban pyntrei tang mar synïoh ïa ka jingkular kaba pura na ka Jylla ban weng lut ïa baroh ki jingeh ha ka surok ban her bad hiar ka liengsuiñ jong ka Kad.
Kine ki bynta ki long kiba kongsan na ka bynta ka jingshngaiñ ki liengsuiñ bad ki dei ki jingeh ba hakhmat eh ha ka jingpynheh ïa ka kad.
U Advocate General A Kumar, ba mihkhmat ïa ka Jylla, u la pan por ban file ïa ka affidavit ba batai kumno yn pyntrei ïa ka jingpynheh ïa ka surok liengsuiñ hapoh ka kad.Ka ïingbishar kala ailad ïa ka jingkyrmen bad bthah ïa ka Jylla ban file ïa ka affidavit hapoh ka Registry hashuwa ka sien shong bishar ban wan bad ban phah copy ruh sha baroh ki liang mamla.
Ka ïingbishar kala bthah ruh ïa u AG ban ai jubab ïa ki mat kiba la pynpaw ha ka paragraph 3 jong ka affidavit bala file da u Amicus Curiar P Yobin.
Kala bthah ruh ïa ki ophisar na ka DGCA bad ka Sorkar Jylla ba kin ïadonlang, la ka long da ka met lane lyngba ka Video Conference, ha ka sien shong bishar ban wan. Ïa kane ka mukotduma la buh ban bishar biang ha ka 23 tarik Naitung, 2026.
