Shillong, Jymmang 26
U Myntri Rangbah ka Jylla, u Conrad K. Sangma ha ka Sngi Palei u la leit jngoh ïa ka Tura Civil Hospital ban khmih bniah ïa ki kam ba ïadei bad ka jingpynbha ïa ki jingdonkam kiba dang ïaid mynta ha katei ka jaka sumar.
Ha kane ka jingleit jngoh jong u, u la ïakren bad ki bor pynïaid jong ka jaka sumar halor ka jingtyllun jong ki kam ki jam, ha kawei ka liang, kiba la ïaid shaid-shaid mynta namar jong ka jingïalang kaba la long hashuwa, ha kaba la ïakren halor ka jingdonkam kyrkieh ban pynbha bad maramot noh ïa ki jingdonkam, nalor ka jingwanrah ïa ki tiar bathymmai.
U Myntri Rangbah u la ïoh lad ruh ban ïakynduh ïa ki nongpang kiba la dep shah sumar ha ka CATH Lab kaba dang shu dep plie thymmai.
U la ai jingïaroh ïa ki bor pynïaid ka jaka sumar bad ka kynhun ki doktor kiba la ïadon bynta ha ka jingsumar klongsnam.
Ki doktor ki la pyntip sha u halor ka jingdonkam ban pynïeng ïa ka Critical Care Unit (CCU) bathymmai na bynta kiba pang klongsnam ha Tura Civil Hospital.
Ha kajuh ka por, ki la pyntip ruh sha u halor ka jingdonkam shuh ïa ki nongtrei na bynta ki tnad treikam bapher-bapher ba kynthup ïa ka jingthung ïa ki ‘Paramedic’ bad ki ‘Technician’ nalor kiwei-kiwei.
Haba ai jingkren hadien ka jingïalang khmih bniah, u Myntri Rangbah u la ong, “Ka dei ka thong jong ka Sorkar ban kyntiew ïa ki jingdonkam ha ka liang ka koit ka khiah hapoh ka Jylla. Ngi la ïakren na ka por sha ka por bad ki bor pynïaid jong ki jaka sumar ha kylleng ka Jylla ban pyntikna ba ki jingdonkam lem bad ki tiar ba ïadei bad ka koit khiah ki long kiba bit ba biang na bynta ka jingshakri kaba paka sha ki nongpang.”
U la ong ruh ba ka CATH Lab ha Tura, ïa kaba la pyndait 2 bnai mynshuwa, ka long kaba donkam eh. Ha ka jingbym don ki lad jingdonkam ba ïadei bad ka tnad sumar Cardiology, kiba bun ki nongpang na Ri-lum Garo ki hap ban leit sha Guwahati na bynta ki jingpang klongsnam.
“Ka CATH Lab bad Cardiology Unit ha Tura Civil Hospital ki la ai jingïarap sha ki nongpang ka Ri-lum Garo kiba donkam ïa ka jingsumar klongsnam ba kyrkieh,” u la ong.
Halor ki jingsumar ba dang shen ha ka CATH Lab, u Myntri Rangbah u la ong, “Arngut ki nongpang kiba la shah sumar ki don hapdeng ka jingma bad ka jingpynslem ha ka jingsumar ka lah ban ïalam sha kaei-kaei ka bym sngewtynnad. Nga ai jingïaroh ïa ka kynhun ki doktor kaba la seisoh ha ka ban pynlong ïa ka jingsumar kaba jop bad ban pyllait im ïa ka jingim jong ki nongpang.”
U la kular ba ki kam ban kyntiew ïa ka jingsumar ha ka koit ka khiah ha kylleng ka Jylla kan ïai bteng bad ka Sorkar kan nang pynkhlaiñ ïa ka tnad ha baroh kawei ka Jylla.
Hadien ka jingïalang, u Sangma u la bthah ïa u Chief Secretary ban buddien na ka por sha ka por ïa ki kam kiba dang ïaid ban pynbha ïa ki jaka sumar bad ki jingdonkam ha ka tnad ka koit ka khiah kumjuh ban phah kaiphod sha u halor kane ka bynta.
