Shillong, Jymmang 26
Uwei na ki nongtih dewïong uba la ngat ha ka apot jong ka jingshah ban ha ka twa khyndew ha Tinsukia distrik jong ka Assam, u la don ha kane ka kam la kumba saw bnai eiei.
Lah ban kdew ba ar ngut ki nongshong shnong ka Ri Bhoi ki la sahkut shapoh kawei ka krem dewïong na ka jingtwa khyndew ha ki lum Patkai jong ka thaiñ mihngi ka Tinsukia distrik jong ka jylla Assam ha ka shiteng synñia jong ka 25 tarik Jymmang.
La ïathuh ba kitei ki ar ngut na Ri Bhoi ki dei kiba la leit ban trei bylla tih dewïong ha kawei ka par dewïong be-aiñ kaba la tip kum ka Tikak kaba don hapdeng ka Bargolai bad Namdang jong ka thaiñ Ledo. Kane ka jaka ka don ruh ha khappud jong ka jylla Assam bad Arunachal Pradesh.
Kitei ar ngut na Ri-Bhoi kiba la don ha katei ka krem ki dei kiba la tip kyrteng kum u Bah John Nongrum na ka shnong Umsohlait bad u Bah Phingel Umbah na ka shnong Shnah Tyrkhang ha Korhadem. Kine ki shnong ki dei kiba hap hapoh ka Mawhati konstitwensi.
Haduh mynta, ym pat lah ban pynthikna la kitei kiba la sahkut shapoh krem dewïong ki dang im ne khlad namar ka jingwad ka dang ïaid.
Haba ïoh ban ïakren lyngba ka ‘Phone’ bad uwei na ki bahaïing hasem jong u Bah John Nongrum, u la ïathuh ba u Bah John, uba la don kumba 38 snem ka rta, u la don ha ka kam tih dewïong ha katei ka thaiñ la kumba saw bnai eiei mynta. Hapdeng kine ki saw bnai ba u la trei bylla ha katei ka jaka, u Bah John u la ju wan sha la ïing la sem.
“I Mama jong ngi, ha ka jingduk jingkyrduh, i la hap ban wad bylla ha kylleng ki jaka, bad i la leit sha katei ka thaiñ ban tih dewïong,” la ong u pyrsa jong u Bah John ha ka jingïakren bad u nongai khubor.
U la ïathuh ba u Bah John u la don san ngut ki khun. U la ong ruh ba ki la don saw ngut ki nongtih dewïong kiba la sahkut shapoh jong katei ka krem dewïong bad haduh mynta ym pat tip la ki dang im ne ki la khlad.
U la ïathuh ruh ba ki bahaïing hasem jong u Bah John Nongrum bad u Bah Phingel Umbah ki la don lang mynta ha Tinsukia kynthup ïa ar ngut ki pulit ba la phah na kane ka jylla.
Kine kin sa leit sha katei ka krem dewïong ha ka step Lah Sngi U Blei.
