![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Jowai, Jymmang 24
U District Magistrate jong ka West Jaiñtia Hills District u la hukum ïa ka PWD Central Division Jowai bad ïa ka Dhar Construction ban sangeh noh mardor ïa ka jingshna ïa ka surok Jowai Bypass na Khliehtyrchi sha Wahtreiongriang tad haduh ban da pynbiang ki lad jingïada na ka jingtuid jong ka khyndew sha ka wah.
La pynmih ïa katei ka hukum katkum ka kyndon aiñ kaba 144 jong ka Criminal Procedure Code ne ka CrPC hadien ka jingmih ka jingud jingnam halor ka jingjngut jong ka ka umbam umdih kaba la tan na ka Wah Myntdu na ka daw jong ka jingtuid ka khyndew ba la mih na ka jingshna ïa ka surok Jowai Bypass kaba thymmai.
Lyngba kane ka hukum, u District Magistrate u la khang ban khlong maw, khlong shyiap ha Wah Myntdu bad ki rud jong ka. Shuh shuh u la mana pyrshah ban saitjaiñ, sait-kali, theh khyndew theh ñiut hajan ka wah.
La khang ruh ban bret ïa ki jakhlia-jakhlait sha ka wah.