Shillong, Naitung 22
U Myntri Rangbah ka Jylla Conrad K Sangma u la ïakynduh ïa u Myntri ka Sorkar Pdeng ba khmih ïa ka tnad Civil Aviation u Kinjarapu Rammohanan Naidu ha ka 21 tarik Naitung, 2026 bad pan ïa ka jingkyrshan ka Sorkar Pdeng ban pyntyllun shakhmat ïa ki projek kad liengsuiñ da ka jingthmu ban pynkhlaiñ ïa ki lad pynïasoh lyngba ki liengsuiñ ha kylleng ka Jylla Meghalaya.
Ha man ki projek, ka Sorkar Jylla kala pyndep ïa la ka bynta bad khlem ki jingai jingbit bad ki rai na ka Ministry kan nym shah ïa ki ba kin ïaid shakhmat.
Kaba hakhmat eh ka dei ka jingpynheh ïa ka Shillong Airport ha Umroi. Ka Jylla kala aiti ïa ka jaka ba 22 akar sha ka Airport Authority of India (AAI), ki Environmental Clearance kila don, bad ka AAI kala aiti ïa ka kam ban pyntrei pynheh ïa ka surok liengsuiñ (Runway).
Shisien bala dep kine ki kam, ka surok liengsuiñ ba kham jrong kan ailad ïa ki liengsuiñ ba kham heh kum ka A320 ba kan wan shakri, plie ïa ka lad ban pynïasoh ïa ki liengsuiñ beit-beit sha ki sorbah bad pynduna ïa ka jingshaniah ha ka jingïaid lynti kaba jngai lyngba ki surok na Guwahati. U Myntri Rangbah u la kyrpad ïa ka Directorate General of Civil Aviation (DGCA) ban ai ïa ka jingbit ban pyntrei kam khnang ban lah sdang noh ïa ka kam ba la aiti ban pyntrei, da ka jingweng ïa ki jingwit ha ka jaka ïaid ki liengsuiñ. Ka Jylla kala pynlut nalade ban pynkhuid ïa kine ki jingwit, kynthup ka jingpynkynriah ïa ka shnong Umden Mission ba T.150 klur, bad kala pynskhem ïa kane ka jingkular hakhmat ka ïingbishar High Court ka Meghalaya.
Na ka bynta ka Ri-lum Garo, ka Jylla kala kyntu ïa ka AAI ba kan shimti ban pynïaid ïa ka Baljek Airport ha Tura kum ka kad ba pura ka AAI, haba tyrwa ban kynshew nalade ïa ka jinglut jong ka projek ba kot T.63.67 klur.
Ïa kane ka kad la tyrwa ban pynïaid da ki bynta bynta, kaba sdang da ka liengsuiñ ba 19 seat bad jam sha ka ATR-72 bad A320.
U Myntri Rangbah u la pan ïa ka jingbei tyngka lyngba ka Regional Connectivity Scheme (RCS-UDAN), ha kaba yn sa pynphai pat ïa ka jingkynshew tang mar syn ai jingmynjur ïa ka projek.
Artylli ki heliport ha Shillong bad Tura la dep ban mang pisa bad kila don hapdeng ka jingpyntrei ïa ki kam. Ka Jylla kala ithuh biang sa ïa khyndai tylli ki jaka ha ki district Headquarter bad ki jaka jngohkai, bad pan ïa ka jingbei tyngka ïa kumba artylli na ki napoh ka RCS-UDAN ryngkat bad ki jingwad bniah ïa ka jinglah ban pyntrei ïa ki kam jong baroh ki projek.
